【阿碌開咪】唔信專家信盲炳？

上周小弟公開宣布會打疫苗，真好玩，放上個人「粉絲群組」後，N咁多反應，當然絕大部分皆屬負面的。

這個與所有公開調查一樣，就算親建制的「一國兩制研究中心」做的調查，肯定打疫苗的，也只有兩成幾市民。由此推斷，我只算是四分一香港人之中，願率先接受疫苗注射其中之一。

我決定打疫苗，道理簡單：一、若人人唔打，病毒不去，全世界真正「攬炒」；二、人人遲打，你眼望我眼，不肯做「先行者」，拖個天長地久，也是斷斷續續式「攬炒」。

若果有任何方法肯定可以消除病毒，令大家回復正常生活，而毋須負任何風險的，咁我當然唔打疫苗啦，但冇喎，如今大部分話：「你打先，打完冇事我先諗！」呢個也是正常「人性」，不過，若果個個如此，呢個世界將永冇新藥矣。

人生總要面對「可計算的風險」，然後自行決定Take否。我一定不會考慮網上討論區的「吹水」意見，尤其涉及健康的，當然聽專家分析，而不是信「佢哋話喎」咁「騎呢」。

這個乃小弟經多年「慘痛經驗」累積回來的。話說二十五年前，身體能量推到全部頂磅，於是出現血壓高、膽固醇過高及精神情緒病。

三樣皆要長期服藥，日日服。

起初當然抗拒，因早存「偏見」，認為西藥副作用大，身邊人又個個扮「專家」說三道四，去到街市，肥強與順嫂皆話食西藥咁咁咁（但全無科學根據）。最離奇老友之中，就算是知識分子（但非醫學及藥劑），也不停話食西藥有問題。

終於我自己偷偷減藥或停藥，結果……血壓立即爆升，搞到眼中風。膽固醇飆升到危險水平。情緒抑鬱全面復發。

覆診時，當然畀醫生省：「專家意見唔聽，你聽街邊盲炳講？佢哋識乜呢？」

結果按指示服藥，已二十五年，不但冇副作用，兼且健康愉快，生活正常。

打疫苗，我當然聽專家講，唔通又聽網上班業餘盲炳亂噏？

曾智華

阿碌開咪