【阿碌開咪】TVB地震點睇？

上周四整個電視圈恍似「核爆」（電視圈咋，其他人可能唔多關心），因TVB公布曾志偉及王祖藍回朝，並非做幕前，而是權傾一時，執掌「無記」所有戲劇節目以外的板塊，位極高，權極重也。

　　公布來得閃電般急，當事人也不在香港，點解呢？為乜唔等齊人，開個正正式式記者會，有板有眼有鋪排呢？如今恍似滾水淥腳，唔多妥。

　　其次，呢類通告，理應由管理層最高負責人名義發出，即行政總裁李寶安是也。如今一跳，跳上董事局主席許濤出通告，頗有「架空人」味道。

　　小弟真係聞到陣陣地震味噃，肯定TVB高層大執位即將發生。老友，咁高調、咁高薪（應該啩？）請兩個猛人回來，舊人點企？簡單，舊人得就唔使大陣仗換馬啦，即係暗示舊人唔掂，自己識做辭職啦！

　　公布消息後，我第一時間睇睇無記股價如何，市場點反應？結果反高潮，股價郁都唔郁，七元九角。TVB股價，邵逸夫爵士賣盤後，接貨的所有人，由大股東到散戶，必激氣到想撼頭埋牆，因為邵爵士放手時，「無記」股價曾見六十幾蚊，跟住……搞到如今……你話揸咗佢係咪想「跳樓」？

　　咁情況若發生在任何商業集團，由董事局到管理層，豈能不集體「自刎」以謝天下？但「無記」又如何？除早前主席陳國強拜拜外，大部分高層繼續Hea。如今先地震，有點「It's too late baby」感覺，市場反應明顯也如是。

　　新官上場三把火，第一把，必定燒向音樂節目。近年TVB的音樂政策非常不堪，兼且有「閉門自玩」現象，離晒大譜，實難想像搞成咁而竟多年來冇人需要問責。志偉回朝，憑着圓滑手腕與人脈，應可以救返多少失地。

　　至於綜藝節目，也理應有改善。

　　小弟擔心的，是「無記」再出現幕前係佢，幕後又係佢，分資源係佢，咁……會否享受資源又係佢呢？若如此，好快再出事！

曾智華

阿碌開咪