【阿碌開咪】使鬼你預測咩

今時今日做高官，真係預咗做「沙包」，去到邊都畀小市民作出氣袋，鬼叫你薪高糧準又大權在握咩！如今香港經濟差，失業率高，疫情嚴重，政治氣壓低沉……根本完全冇野可令香港人開懷，谷埋谷埋，當然向低民望政府「開波」，真係乜都可以鬧一餐，無法，倒轉位置也肯定如是。

前日早上，我正打開《星島日報》歎奶茶，再睇睇自己專欄篇《呢班友是否黐咗綫？》，真係日頭唔好講人，文內的四位的士大佬及肥師奶又剛剛殺到，分三枱坐，再開《城市論壇》。

佢哋也屬本報讀者，打開新聞版，睇一版，鬧一單，真好火。最勁鬧……唉，當然又係高官，今勻輪到財爺陳茂波中招。

　　A：「喂，肥強，你一日踩足十二小時，賺幾錢呀吓？」

　　B：「高佬文，今時今日咁環境，賺到三四百蚊算偷笑啦，尤其夜間班大哥，更慘無人道！」

　　A：「即係賺萬零蚊一個月啦。咁考下你，估計失業率會否繼續升呢？」

　　C：「高佬文，乜你問埋啲咁白癡問題㗎？你行出街睇睇，愈來愈多執笠鋪，就知失業率肯定繼續升啦，問都多餘！」

　　A：「呢呢，咪係囉。豬頭炳，你知唔知財政司司長一個月幾錢人工？」

　　D：「最少三十幾萬啦，兼有官邸、工人、司機、管家、廚師……神仙生活呀。」

　　A：「收幾十萬月薪，位高權重，竟作出『阿媽係女人』的失業率將繼續飆升預測，真係頂頭槌，肥師奶，你都識預測啦。」

　　肥：「我昨晚睇新聞，聽到都谷鬼氣㗎。小市民想知你點拆掂經濟下行及失業率高升，你就好似乜『橋』都冇，就走出嚟曝光獻世，唉……」

嘩！我聽到一額汗，睇嚟「波叔」肯定畀人鬧到《財政預算案》出籠嘞。不過，又係嘅，失業率升，使鬼你預測咩？等我預測今晚快活谷跑出邊隻仲好啦。小弟提供三隻：「戰熊三千」狀態處頂峰，不停拍跳；「專一」為咗向老婆大人表忠而落注；「明月輝煌」韋達攬住親操，有手影！一於每隻買佢十蚊雞WP！

曾智華

阿碌開咪