【阿碌開咪】個腦生咗去邊忽？

童年時，幾乎日日畀家中長輩及老師責罵（如今改畀老虎乸責罵！），N咁多款責罵用語之一：「你個腦究竟生咗去邊？」

通常斷正，冇得駁，錯的絕對是唔應該錯的事，所以只好死魚咁款受「靶」，望快啲鬧完就閃。

今日諗起——你個腦去咗邊？因見到一班成年人真係冇腦到爆，肯定無知加上貪心，於是成為騙徒的肥水魚，自願游入籠，被劏到你一頸血再放清。

乜事呢？乃因有八十名成年人，竟然相信呢個世界有種投資是「零風險，高回報」的，咁就攞幾千元至二百萬元走去參加「投資計畫」，投資一個根本唔存在的「馬來西亞度假區發展項目」。

最離奇，佢哋竟然信有投資會是零風險，但一年後會有數倍回報！你話係咪個腦唔知生咗去邊一忽？更戇居，真金白銀「投資」，竟然儍下儍下就將錢存入騙徒戶口，之前完全冇簽署任何文件或協議，真的是一招「空手入白刃」，就送錢畀騙徒。班苦主並非第一日做人，而是三十三歲至八十四歲的成年人，咁「豬」，點會有人同情？

其實作為香港人，肯定一生之中，必遇過一百幾十個騙子。由童年街市擺檔的魚蝦蟹開始，到成年一定聽過「龐氏騙局」、「種菌騙局」，到畀人游說買「倫敦金」……當然今天不少騙徒已升呢，將一切包裝成金融產品、投資產品，引你上當。

乜野人會上當？真係小學生都應知，第一是無知，第二是貪心。而當中貪心所佔的比重，一定比無知更大，所以成年人也紛紛中招。

正常智慧的人，行走江湖，必理解「冇咁大隻蛤乸隨街跳」，一遇不合理回報的任何人事物，皆一律彈開可也！　　突然有靚女埋身？唔該自己先照下鏡！

突然有超筍必賺生意預你一份？問下曾重重交學費的過來人血的經驗。突然有「零風險，高回報」投資益你？咁辛苦Sell你嗰位做乜仍要開工呀吓？

總之成年人冇腦中招，搵鬼同情矣！

曾智華

阿碌開咪