【阿碌开咪】个脑生咗去边忽？

童年时，几乎日日畀家中长辈及老师责骂（如今改畀老虎乸责骂！），N咁多款责骂用语之一：「你个脑究竟生咗去边？」

通常断正，冇得驳，错的绝对是唔应该错的事，所以只好死鱼咁款受「靶」，望快啲闹完就闪。

今日谂起——你个脑去咗边？因见到一班成年人真系冇脑到爆，肯定无知加上贪心，于是成为骗徒的肥水鱼，自愿游入笼，被劏到你一颈血再放清。

乜事呢？乃因有八十名成年人，竟然相信呢个世界有种投资是「零风险，高回报」的，咁就攞几千元至二百万元走去参加「投资计画」，投资一个根本唔存在的「马来西亚度假区发展项目」。

最离奇，佢哋竟然信有投资会是零风险，但一年后会有数倍回报！你话系咪个脑唔知生咗去边一忽？更戆居，真金白银「投资」，竟然儍下儍下就将钱存入骗徒户口，之前完全冇签署任何文件或协议，真的是一招「空手入白刃」，就送钱畀骗徒。班苦主并非第一日做人，而是三十三岁至八十四岁的成年人，咁「猪」，点会有人同情？

其实作为香港人，肯定一生之中，必遇过一百几十个骗子。由童年街市摆档的鱼虾蟹开始，到成年一定听过「庞氏骗局」、「种菌骗局」，到畀人游说买「伦敦金」……当然今天不少骗徒已升呢，将一切包装成金融产品、投资产品，引你上当。

乜野人会上当？真系小学生都应知，第一是无知，第二是贪心。而当中贪心所占的比重，一定比无知更大，所以成年人也纷纷中招。

正常智慧的人，行走江湖，必理解「冇咁大只蛤乸随街跳」，一遇不合理回报的任何人事物，皆一律弹开可也！　　突然有靓女埋身？唔该自己先照下镜！

突然有超笋必赚生意预你一份？问下曾重重交学费的过来人血的经验。突然有「零风险，高回报」投资益你？咁辛苦Sell你嗰位做乜仍要开工呀吓？

总之成年人冇脑中招，搵鬼同情矣！

曾智华

阿碌开咪