【阿碌開咪】「風水碌」論樓市

嗱嗱嗱，講明，我自嘲「風水碌」，即冇權充專家指指點點，只不過以個人觀察及經驗，加上毫無利益衝突下，推測今年樓市走勢。

抽起條筋講此話題，皆因早幾日睇到有傳媒邀請五十位專家預測樓市，結論——九成對今年樂觀，六成二料樓價升，最牛看漲一成！

哈哈哈，睇睇乜水專家會作出如此「離地」樂觀先，哦哦哦，唔怪得知啦，原來全部為地產界中人，呢招乃小學生都識的賣花讚花香矣。唔通自己賣的貨，會話「將會冧價」？想返公司畀大老闆踢屁股乎？利益所及，一定要融入角色，政治正確地指樓價會不斷升升升！喂，若任何消費者聽咗佢哋意見，毫不猶豫就飛撲入市，咁就真係冇人救到你嘞。

睇樓市走勢，究竟邊個最客觀？當然毫無利益衝突的權威部門，即差餉物業估價署！

剛發表報告清楚指出，本港樓市持續受壓（如此慘淡經濟現況，唔跌至奇啦），已連跌兩個月，並創過去七個月新低。若與去年同期比較，按年跌幅更擴闊至百分之一點二七。

有少少分析能力者也應知，第四波疫情未過，新冠肺炎影響幾時結束，冇人說得準。

但現實見到街頭滿目瘡痍，日日有商鋪尤其食肆執笠。封關愈封愈勁，旅遊業恢復無期，經濟重創，失業率難以回落。如此情況下，供樓中的失業打工仔，究竟可以再頂幾耐？而又可會有大量新買家出現？喂！答案早已寫在牆上喎。

更嚴重，你知我知，身邊大批中產老友，尤其三十五歲到五十五歲的家庭，準備連根拔移民去也，大潮將會今年二月陸續出現，高潮應在暑假前，因子女要搞入學也。

大部分有足夠經濟實力移民者，都應擁有五百至一千方呎自住物業，要走當然必須出售單位，才有足夠流動現金應付移民生活。我「風水碌」認為，這批人士隨時放出萬計單位。經濟冧檔加供應湧現情況下，你話今年樓市會升？講出嚟都笑大人個口啦下嘛！

曾智華

阿碌開咪