(星島日報報道)劉浩龍(師兄)最近和女友容祖兒時傳分手、時傳復合,傳聞不絕,但他三緘其口不作回應,日前參與遊戲節目時原本想窒人,反被追問感情事,搞到他口啞啞要避開話題!

  師兄日前為梁漢文及林敏驄主持的最後一集ViuTV大型遊戲節目《Good Night Show全民星戰》錄影,玩遊戲期間,原本師兄取笑一起玩遊戲的陳安立與王詠珩,笑言:「有冇花啊?俾佢求婚啦!」怎料林敏驄反問師兄:「你識得話人,咁你自己呢?」嚇得師兄立即笑笑口轉移話題。此外,當眾人聽到響起譚詠麟主唱的世界盃打氣歌《我們的夢》時,大跳十字步,林敏驄又笑謂:「真係大逆不道,譚校長嘔心瀝血嘅傑作,你哋整到大媽廣場舞咁!」