李辰安 - 上海車模，咁嘅？｜辰來之筆
2023-04-25 00:00 
全世界都關注上海車展，中國未試過咁威水，大家都睇新車，我就關注國家車模表現如何！
國產電動車 超級大市場
以前國產車擺車展，都要黐人哋金糠，點都要近住德國「雙B」車廠，或者意大利名跑隔籬，希望參觀者可以眼尾𥄫到自己，真係好謙卑，今時今日，國產車威到連日本、德國大廠都驚，唔通世界變？
「世侄，國產車咁勁是因為依家唔興燃油車，全世界都要講環保，轉去電動車，咁啱內地人消費力上升，大把人買車，形成一個超級大市場，所以就有百年一遇之機會趕上。」大家今日都覺得好熱，夏天來了，而且成日有雨落，不如清清地食鹹魚同白菜，最緊要水滾茶靚，醒醒神先。
今日茶樓老闆喺度坐鎮，先排佢去大灣區飲食考察遊，由珠海、中山，一直去到佛山，認真睇下當地環境。「大家講開車，我都有感而發，內地高收入人士都揸德國名車，不過出租搵食車全部都係大小國產品牌。」老闆話，內地飲食競爭好大，不過，去到順德見到香港茶餐廳吃得開，好似好得當地人受落。
銀行偉話二十幾年前，佢個師傅去完北京搞銀行之後返到香港，同大家分享當地投資心得。「師傅話，行勻成個北京都無見到有港式茶餐廳，所以睇好王府井第二日可以開番家。」點解一個Banker咁睇好港式茶餐廳？又可以咁有信心北京人會爭住幫襯？
大家點個清炒白菜仔，加個鹹魚蒸肉餅，其實我想鹹魚粒炒白菜，不過算啦，反正唔食得太多嘢，但係我堅持要老闆招牌之斬大嚿叉燒，仲指明要「爽叉」，問佢有無？「當然有啦，識食叉燒一定要爽，呢家嘢可以賣到好貴，因為此乃香港特色。」
國產車厲害 但唔夠省鏡車模
講開又講，老闆以行家角度分析香港茶餐廳點解咁受歡迎，簡單嚟講，一個字，都係爽。「不過，此爽唔同叉燒嘅爽，連筋帶肉有少少肥之叉燒有嚼頭，謂之爽；港式茶餐廳爽在快手簡單又好食。」正宗古法港式茶餐廳，主打好好飲之奶茶，食，最拿手係餐肉、煎蛋之公仔麵，加塊厚多士同大塊牛油，淋少少煉奶，你話係咪好好味？
「世侄，我伯爺好少同我去茶餐廳，上世紀60年代，要飲好正之奶茶，主要係大排檔。」那些年，中環有好多地道飲奶茶之大排檔，包括有某知名之乜乜園。「當時係街坊為主，中環白領亦因實惠而幫襯。」
明白了，今日之茶餐廳與大排檔一脈相承，爽，最緊要爽，你坐低唔使諗，大排檔經營亦簡易明白，主要來來去去嗰幾樣，重點都係罐頭，唔係餐肉、肉丁，就係腸仔。「澳門多一樣罐頭，就係沙甸魚，辣魚包、辣魚治係濠江特色，不過香港就唔興。」老闆話港式茶餐廳有得做，但係要認真開發絲襪奶茶之正宗口味，一旦搞唔好杯茶，等如港式茶餐廳破招牌。
國產車好厲害，不過，睇下新聞，唔多覺有好多好省鏡之車模。「辰哥，上海車展過千參展商，全國車模唔夠分吖嘛。」你好似有道理。大師兄問︰「睇車一定要有車模，呢個係乜嘢道理？」銀行偉話︰「以前飲茶最緊要有年輕貌美知客，道理相同。」唉，依家飲茶主要係飲茶，知客風雲年代已過，老闆話，香港人愈嚟愈實際。我就話，香港愈嚟愈是但，兼無要求。唔好講咁多，今日鹹魚蒸肉餅唔錯，食完又要開工啦！
《星島申訴王》於3月1日隆重登場，節目為民請命抱不平、追蹤城中熱話，亦會搜羅溫情小故事。你申訴，我跟進，搵91999933，《星島申訴王》隨時候命！
立即報料：https://bit.ly/3IMunqd
你的獨家報料一旦被採用及報導，將獲得乙份獎品。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應