李辰安 - 上海车模，咁嘅？｜辰来之笔
2023-04-25 00:00 
全世界都关注上海车展，中国未试过咁威水，大家都睇新车，我就关注国家车模表现如何！
国产电动车 超级大市场
以前国产车摆车展，都要黐人哋金糠，点都要近住德国「双B」车厂，或者意大利名跑隔篱，希望参观者可以眼尾𥄫到自己，真系好谦卑，今时今日，国产车威到连日本、德国大厂都惊，唔通世界变？
「世侄，国产车咁劲是因为依家唔兴燃油车，全世界都要讲环保，转去电动车，咁啱内地人消费力上升，大把人买车，形成一个超级大市场，所以就有百年一遇之机会赶上。」大家今日都觉得好热，夏天来了，而且成日有雨落，不如清清地食咸鱼同白菜，最紧要水滚茶靓，醒醒神先。
今日茶楼老板喺度坐镇，先排佢去大湾区饮食考察游，由珠海、中山，一直去到佛山，认真睇下当地环境。「大家讲开车，我都有感而发，内地高收入人士都揸德国名车，不过出租搵食车全部都系大小国产品牌。」老板话，内地饮食竞争好大，不过，去到顺德见到香港茶餐厅吃得开，好似好得当地人受落。
银行伟话二十几年前，佢个师傅去完北京搞银行之后返到香港，同大家分享当地投资心得。「师傅话，行匀成个北京都无见到有港式茶餐厅，所以睇好王府井第二日可以开番家。」点解一个Banker咁睇好港式茶餐厅？又可以咁有信心北京人会争住帮衬？
大家点个清炒白菜仔，加个咸鱼蒸肉饼，其实我想咸鱼粒炒白菜，不过算啦，反正唔食得太多嘢，但系我坚持要老板招牌之斩大嚿叉烧，仲指明要「爽叉」，问佢有无？「当然有啦，识食叉烧一定要爽，呢家嘢可以卖到好贵，因为此乃香港特色。」
国产车厉害 但唔够省镜车模
讲开又讲，老板以行家角度分析香港茶餐厅点解咁受欢迎，简单嚟讲，一个字，都系爽。「不过，此爽唔同叉烧嘅爽，连筋带肉有少少肥之叉烧有嚼头，谓之爽；港式茶餐厅爽在快手简单又好食。」正宗古法港式茶餐厅，主打好好饮之奶茶，食，最拿手系餐肉、煎蛋之公仔面，加块厚多士同大块牛油，淋少少炼奶，你话系咪好好味？
「世侄，我伯爷好少同我去茶餐厅，上世纪60年代，要饮好正之奶茶，主要系大排档。」那些年，中环有好多地道饮奶茶之大排档，包括有某知名之乜乜园。「当时系街坊为主，中环白领亦因实惠而帮衬。」
明白了，今日之茶餐厅与大排档一脉相承，爽，最紧要爽，你坐低唔使谂，大排档经营亦简易明白，主要来来去去嗰几样，重点都系罐头，唔系餐肉、肉丁，就系肠仔。「澳门多一样罐头，就系沙甸鱼，辣鱼包、辣鱼治系濠江特色，不过香港就唔兴。」老板话港式茶餐厅有得做，但系要认真开发丝袜奶茶之正宗口味，一旦搞唔好杯茶，等如港式茶餐厅破招牌。
国产车好厉害，不过，睇下新闻，唔多觉有好多好省镜之车模。「辰哥，上海车展过千参展商，全国车模唔够分吖嘛。」你好似有道理。大师兄问︰「睇车一定要有车模，呢个系乜嘢道理？」银行伟话︰「以前饮茶最紧要有年轻貌美知客，道理相同。」唉，依家饮茶主要系饮茶，知客风云年代已过，老板话，香港人愈嚟愈实际。我就话，香港愈嚟愈是但，兼无要求。唔好讲咁多，今日咸鱼蒸肉饼唔错，食完又要开工啦！
《星岛申诉王》于3月1日隆重登场，节目为民请命抱不平、追踪城中热话，亦会搜罗温情小故事。你申诉，我跟进，搵91999933，《星岛申诉王》随时候命！
立即报料：https://bit.ly/3IMunqd
你的独家报料一旦被采用及报导，将获得乙份奖品。
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应