工厦小情侣唔怕捱　中女住货柜屈阁楼

讲过金融公司老板Paul、「劏房专家」吴龙飞，《有楼万事足》亦访问一对住喺工厦嘅小情侣Mina、Michael。Mina以另一个朵「Mean娜」喺网上男性话题专页做编辑，Michael就系幕前工作者。虽然住工厦实属违法，绝不鼓吹，不过一对小情侣自言以4千几蚊租到160尺单位，都算系咁。 佢哋都道出住工厦唔方便，要行出去公共浴室冲凉，有人拍门又惊系地政署人员巡查，仲要set定暗号返屋企，畀对方知道系「自己友」。不过Mina开心指「我嘅幸福指数有8」，愿意一齐捱，好Sweet。 住工厦都嫌贵？仲有住货柜，更加平租，月租3千5连车位，你又点睇？32岁嘅时装店老板娘Icy租住新界区货柜，有独立厨房、厕所，货柜坐4个人开饭都仲有位剩，几咁阔落。辛酸就系夏天多蛇虫鼠蚁，Icy话：「蜘蛛有拳头咁大，曱甴飞得好高。」最后Icy悭足几年终于上到车，又一励志例子。 另一位曾任小学教师嘅28岁Bianca，为创业住铺头阁楼，夏天冇冷气，要去体育馆冲凉，有时抹吓身直接瞓觉。佢就话做教师好易被取代，选择创业，住阁楼悭钱。