「高潮」Seasun连环夹胸抛金句　港男阿龙插爆：有啲女仔好唔要面

「冇楼咪白撞」、「有楼有高潮」嘅金句都洗板好几日，仲有辑疑似系「高潮」Seasun（邓湤鉮）嘅性感相流出，近乎一丝不挂，就知Seasun几咁火辣辣。昨晚首播嘅TVB真人骚《有楼万事足》，终于睇到多啲Seasun嘅片段，无论睇楼、整甜品、做首饰Model，通通抛胸上阵，打大个心口任睇，条裙有咁短得咁短。卖弄性感嘅Seasun，真系自信爆棚，不过网民就O晒嘴「做咩啫佢？」、「冇钱买布？」 在节目中，Seasun自爆曾与任职测量的爱尔兰男友拍咗好几年拖，到谈婚论嫁阶段时，先惊觉文化大不同。知道女方包办婚礼开支、买楼，觉得离谱嘅Seasun亦似乎因钱银斩情根。之后，制作单位安排Seasun去Dream house，亦即系何文田过千尺旧楼，当经纪指「1千万首期就买到」，Seasun理所当然地说：「钱唔系问题，又唔系我畀。」好嘢多人抢，亦系Seasun的对成功男士嘅睇法，对住婚姻亦有自我一套观点：「唔好嘅，送都唔要，香港法律系一夫一妻制，我系合法太太，始终有保障。」言下之意，正印老婆分老公身家都分得理所当然？ 除了将爱情比喻成「公猴爱洞穴」论，继而俾网民闹肤浅的Seasun，在节目中表现出淑女的一面，挤出事业线整甜品，语出惊人的她又抛金句：「等佢食完晚餐最后一道菜嘅时候，我就捧住个蛋糕问佢，你要个Dessert定要我呢？」 听过Seasun的「伟论」，节目安排一位28岁、名叫「阿龙」的音响公司老板道出部份男士的心声，佢就话：「我觉得有啲女仔好唔要面，阿姐！依家咩年代吖？男人一定要包养女人？」