买楼靠父母　23岁Ernest睇中靓盘：450万好平呀！

TVB话题节目《有楼万事足》，播到第3集，访问到一位年仅23岁、大学建筑系毕业无耐嘅后生仔Ernest。已成功做业主，放租出去畀人帮手供楼嘅Ernest，相比「105%姐」Macy、「50蚊哥」嘅经历，明显轻松得多。上车靠父母嘅佢喺节目中分享：「有日行过地产铺，层楼450万，好平呀！即刻打畀妈咪，佢问我够唔够钱，使唔使写支票。」有父母帮手畀首期，Ernest买咗个港岛区蓝筹屋苑两房单位。 葡萄Ernest时，Ernest亦讲返自己妈妈都系努力做嘢储钱先捱到今时今日，佢仲话：「其实唔洗去羡慕边个，人哋会谂『你开心啦，有楼』，你话楼价高，都要储钱㗎。」 另一位28岁嘅Roy，虽然都有阿妈笔退休金帮手畀首期，不过靠自己供楼嘅佢，似乎冇Ernest生活得咁轻松。放弃万几蚊写字楼工，Roy毅然转行做扎铁，日日身水身汗，返工畀人「问候」，晒到甩皮，都系想为家人置个安乐蜗。