星8卦丨「短脚」得罪人多臭品推job翻身无望

2023-05-02 10:00

「短脚」份人少年得志，基本上出道就红唔使捱，未稳住脚就同「外省仔」爱得痴缠，激到啲经理人生虾咁跳，决定送佢北上点知又畀佢红到发紫，渐渐睇唔起香港呢个发迹地。

捞得掂嘅「短脚」又开始挂念出身地，因为当年红得目中无人兼四围点起火头，当佢决定回归，受过「短脚」唔少气嘅相关人士，梗系唔会畀好日子佢过。「短脚」都好聪明，出高价请位经理人帮手，希望对方帮佢喺香港再振声望，一心谂住自己喺内地咁红，搵咁多钱，大家仲唔仆住嚟巴结。

哈，点知啱啱相反，你巴闭你嘅事，人哋唔卖帐你奈我咩何呀，总之佢啲新闻石沉大海，难为嗰位经理人讲到牙血都流晒，依然令「短脚」唔满意，好彩经理人都有啲人脉。但系「短脚」依然好刻薄，埋怨佢做唔到嘢。

然后呢，又唔知自己已经无乜人气，本土客对佢印象唔好，系咁迫经理人做嘢，好唔容易搵到个肯畀七位数出场一阵就收工嘅笋job，「短脚」竟然嫌三嫌四，话自己喺内地有工作，死都唔返嚟，激到经理人生虾咁跳，仲要成日闹自己接唔到嘢俾佢做，呢啖冤屈气，经理人绝对吞唔落，索性反炒佢鱿鱼，所以「短脚」完全绝迹香港，畀心机赚人仔，土味日浓罗！