星8卦丨「才女」自以为靓恨做幕前未如愿煽动公司一姐失败即炒

2023-04-18 10:00

人最紧要有自知之明，否则就好似「才女」咁两头唔到岸。作为「才女」就梗系才华比样貌占嘅比重多啲，偏偏「才女」就系幕后中叫有两分姿色同身材，咁你靠幕后出身，大家自然畀多几分，因为你唔系贩卖色相吖嘛。

可惜几年落嚟，听埋听埋啲麻甩佬评语，以为自己真系畀幕后躭误，可以全力进军幕前。好几次出嚟，打扮到好似只雀咁，直情当正自己系女主角。最唔知掟嘅系佢以为自己有啲美色又后生，竟然想冧掂老板送佢去进修，呢啲课程一啲都唔平，仲要飞十几个钟去上堂，之前见「外省妹」氹前夫畀咗两球去进修，果然成绩好好，又识到好多外国人，系一个冲出国际嘅机会。

但你都咪当老板傻，又唔系自己条女，点解畀咁大投资喺「才女」身上？佢仲要唔识睇眉头眼额，扭计唔签约仲要加三倍人工，老板心谂搵个后生听话大有人在，直情当佢透明。「才女」份人好识氹自己认为有价值嘅人，佢搞到公司最得宠嘅「囡囡」心郁郁要搵佢帮自己拍代表作，于是成日烦老板要开戏，但老板明知「囡囡」唔啱做戏，后嚟知道系「才女」喺背后煽风点火，嬲到即刻吩咐高层唔使再同才女倾，完约就中止合作，送瘟神走费事影响军心。