古天后日志｜机构投资者倾向现水平沽货套现

7月4日，多云，有骤雨及狂风雷暴，天气持续不稳定。美股上周五再见V弹，主要系10年债息回落至2.8%，今晚美国独立日假期休假，但道指期货仍然有交易，目前喺亚洲时段偏软，睇嚟今日港股难免脚软。喺市场都已接受喺高通胀下，美国要继续加息，年底息口更要高企于3%以上之际，10年期债息却反其道而行，回落至2.8%水平，好明显系市场正打赌美国经济或步入衰退，届时息口要掉头向下。

其实从资源价格开始走软，铜价已跌至每吨8000美元水平，或反映经济有机会步入不景气，而铜嘅使用量一直系经济领先指标之一，需求下降，自然就系经济衰退嘅先兆。除咗铜价之外，油价亦见顶回落，即使油价仍处于100美元水平之上，但油股已从高位回落。再睇另一个业绩表现唔错嘅半导体板块，更加惨不忍睹，股价一再穿底，喺经济步入衰退嘅环境下，各行各业都难以受惠。

有见及此，坊间有指联储局可能随时出手救市，加息变减息，但喺通胀仍高企下，减息似乎无乜可能，尤其联储局已多次强调目前首要任务系先控制通胀，而联储局已被唔少经济学者指责，联储局喺已错过最佳加息时间，反应慢半拍。若然家下又急急脚话减息，其公信力只会再被质疑，况且目前美股只系较高位回落16%左右，就算要救市，都等到标指回落至2020年疫情爆发前顶，先考虑停止收水先叫合理。

六不绝 七月必要无翻身

至于港股经过五不穷，六不绝之后，七月即系无翻身必要，反而要考虑系7月能否延续6月升势，咁就要睇再有冇资金流入支持大市向上。再有冇新资金进入港股市场，古天后无水晶球，当然不得而知，但眼见系腾讯(00700)主要股东出尔反尔，讲到明再喺市场沽货，要沽几多货无讲明，但从CCASS睇，高盛就多咗9000万股货待价而沽。

而另一个例子系商汤(00020)喺上周一到半年禁售期完结，即出现断崖式单日大跌逾四成，超过30亿元嘅股份已先注入CCASS等沽货，而沽货嘅投资者，当然系上市前已入场ABCDE轮嘅机构投资者，佢哋嘅成本系几多，当然平过IPO价，即系话就算现水平沽货仍有利可图。

另外市场一直担心等钱使嘅软银，随时要沽阿里(09988)套现，咁啱得咁桥，CCASS喺上星期见到花旗就接咗超过7亿股，而呢批股份睇怕又系待价而沽。即系咁讲，就算港股唔再插水，但唔少人喺呢啲水平都系等紧沽货套现，多过积极入市，而港股喺22500水平阻力唔细，睇嚟7月嘅港股，或者步入上落市格局。

古天后

(徐狄怡，证监会持牌人)