【独家】开YouTube频道寓工作于识女仔 Eric 肥谷笑师兄有女就变样
2021-01-28 22:31 
早前，音乐人Eric Kwok（郭伟亮）与刘浩龙(师兄)及谷德昭于YouTube开设频道《Round Table Poker》，并邀请嘉宾玩德州扑克，输家要食最怕嘅嘢嚟大惩罚！周秀娜就因为输咗要食湿狗罐头加饼乾食到扁晒嘴，而JW就食超级芥辣寿司搞到流晒眼泪，至于两岁开始唔食忌廉蛋糕嘅何超仪更食到反胃，最好笑系刘心悠竟提出食Wasabi仙人掌，去得咁尽反而吓亲大家，众主持齐揿住佢大嗌唔好！采访：方骞平 场地：THE STADIUM@观塘兴业街
《Round Table Poker》逢星期一及四晚上六时播出，节目中，郭伟亮同刘浩龙会将由细玩到大嘅小玩意搬出幕前，仲搵埋老友谷德昭一齐玩，肥谷笑说：「因为疫情喺屋企完全冇嘢搞，剧本又写唔到，几十岁人咪学吓做YouTuber，等第日熟习玩法收集到大数据时，可能发展到啲嘢出嚟拍，好似拍剧咁。」
讲到节目玩德州扑克，郭伟亮说：「我细个有段日子好锺意讲大话，玩牌时只系做返以前嘅自己。今次聚埋一齐讲嘅嘢都几抵死，气氛好值得畀观众感受吓，而且多啲女嘉宾系几开心嘅，会有多啲灵感写多啲歌，其实搵个藉口嚟识吓人。」刘浩龙笑住认同，「呢个系最好嘅机会嚟！」肥谷即笑住踢爆师兄：「有陌生女仔喺度，佢个人就唔同，好似见家长咁，得我哋几个时又变另一个样，所以我哋好锺意请女嘉宾返嚟克制佢，(介绍女仔畀佢？)每个礼拜都有，仲想点呀？我哋都用心良苦，第日要好好答谢我哋添呀！散场时，见师兄争住话『不如我送你返屋企！』即系代表呢个女嘉宾，喺呢盘牌入面表现得好好。」师兄尴尬大笑扯开话题：「好似JW咁，佢咪比想像中更活泼，而且好聪明；娜姐就有义气；心悠够放，平日睇唔到佢有呢一面；超仪就好有气场，好似赌神上身咁，超有运气。」
最新回应