【独家】揭《造星III》十强私密 Alina提网民即喊 KLAU认恋KiKi Cloud甜赞男友好靓仔

全城热爆《全民造星III》进入十强阶段，网友纷纷拣出心水，暂时以Cloud、苇旋和ANSONBEAN被睇高一线，呢日《头条日报》邀请十强参赛者互选，结果亦差唔多，Cloud、苇旋和Ben各有两票支持。不过网民有兴趣嘅话题，《头条》当然有帮大家追问，Cloud讲到被爆拍拖多年男友Ryan合照，她提到男友劲搞笑狂赞放闪；而被爆参赛期间挞着参赛者KiKi的KLAU，他就暗暗认恋；至于男友是MIRROR成员Stanley的Alina，提到网民负评都忍唔住喊，不过讲到得到偶像张敬轩follow ig，她反应同CY知道俾谢安琪follow ig一样开心到尖叫，而CY仲自爆张继聪私讯佢𠻹！想八就睇落去啦！撰文：杜淑霞 摄影：谭壹致 服装@initialfashion(Cloud)

被网友称为「晕姨」的Cloud（云浩影），对于粉丝自称「迷云党」觉得好搞笑，「呢个名好好笑，我想改过第二个，但系未谂到，依家好似呃人咁样，不过我都系呃咗佢哋嘅，哈哈！」对于被爆男友Ryan合照，Cloud话估唔到反应咁好，仲趁机疯狂赞男友放闪，「初初都有啲惊讶，但系我见到啲comment系正面嘅。（譬如赞靓仔？）佢真系好靓仔，佢好好嘅，我几surprise有啲人话『你几幸福』、『男才女貌，好衬』，佢真系好靓仔，佢唱歌又好好听。（点支持你参赛？）佢会买好多零食畀我，因为我瘦咗太多，因为太辛苦，食嘢我会开心嘅，所以近排食饭，佢都问我想食咩就我，佢会买曲奇，因为我好锺意食米线，佢最近餐餐陪我食米线，都冇乜怨言。」仲话男友都想去总决赛撑她。


同样被爆恋情仲有KLAU（刘瑞祈），要他对一个《造星III》参赛者讲心底话，他拣了KiKi狂赞，话对方演员出身都好有音乐才华，参赛期间跳舞亦有进步，遗憾对方入唔到十强，仲话：「佢喺演艺路上面，有好多机会畀佢继续发光。」问系咪女友所以拣KiKi，他就尴尬话：「系好好嘅朋友（你啲fans都叫『KiKi』系咪刻意？）唔系，上年玩完《造星II》嗰阵时有fans话帮我开个fans club，问我想叫咩名，嗰阵时我未识佢，我叫K不如叫『KiKi』纯粹食番个字嘅意思，之后识佢系几有缘。我喺比赛前两个月识佢，因为ViuTV另一档节目，我成排兄弟同佢一齐拍就咁认识。（有缘落去？）都会继续咁样发展吓罗！」

CY爆俾张继聪DM

男友是MIRROR成员Stanley的Alina（李静莲），讲到网民负评一度喊咗出嚟，但反而唔关Stanley事，「最唔开心可能系话『你都系跳嗰啲啦！』我嘅睇法系我跳舞唔系好叻，但系呢个真系我用尽我200%嘅努力，嗰5年我喺演艺真系好努力去钻研舞蹈，只不过我唔系最top嗰个，但系我会好proud of自己，就算我系一个舞者，但系冇可能每一种舞都识，其实廿进十强表演，我系专登攞番pre round个表演去做，我想去讲番自己同大众听，就系成个《造星》过程令我睇嘢有咩唔同咗。」不过当记者提到张敬轩follow她ig，她即收眼泪兴奋尖叫，原来两人曾合作拍广告，但只属一面之缘，「佢系我偶像嚟㗎！畀偶像follow系好开心嘅事。有次我同Stanley去佢餐厅食嘢佢都认得我，但唔知佢follow我，（有咩同轩仔讲？）多谢你！我睇咗佢两场演唱会，好欣赏佢对每个表演者都好尊重，好多嘢向佢学习。」




CY（陈泽言）认为能够打入十强，最想同首轮被他连累踢出局的Vincent讲：「我带住你嘅梦想入到十强，我会帮你行埋去。」记者提到谢安琪有follow他ig，他搲晒头，仲自爆张继聪有DM他，「我真系冇留意，因为之前张继聪都有出个post去repost番我嘅post，佢有讲啲鼓励嘅说话，系DM话呢行嘅心态好紧要，佢担心我有啲压力上嘅嘢会承受唔到，好愿意做我聆听者，佢话我有啲咩唔开心可以同佢分享，会畀啲意见我，跟住我同佢讲咗一句好好笑『我好开心呀！你放心我有咩困难一定会麻烦你』我有啲咩问题唔明，有前辈我都想问佢哋意见，同埋我本身好锺意张继聪。」