【独家】被CY踢出《造星III》十强获网民同情　Timo手机任Check笑住爆粗

Timo（江宏基）在《全民造星III》的20强比赛于昨晚播出，对战同为B组的CY（陈泽言）。先出场的CY演唱萧敬腾的《王妃》，Timo就跳唱Billie Eilish的《All Good Girls Go To Hell》迎战。一众评判都认同Timo强项是跳舞，不过在唱歌方面扣了不少分，评判陈柏宇甚至狠批他唱歌：「我觉得你唱唔得，严重唔得，唔应该拣英文歌。下次可以唔唱歌，因为《全民造星》冇话要全民造歌星。」结果CY以4比1挥低Timo，成为第7位进级十强参赛者。落败的Timo爆喊，原来他一直对前哨战获睇高一线，到后来遭网民不断的攻击而感到压力，连监制花姐和导师彭秀慧都认为他失去了当初的星味，真系睇见都心痛。

输10强赢民心
节目播出后，Timo又跟同样出局的B组战友右雨于社交网开Live，右雨大爆对方在比赛中途因负面报道变得沉默，并喊道：「有段时间我哋谂，佢都唔系咁嘅人，不如我哋出Post帮手解释，但Timo想我哋少啲出声，出面火势好劲，唔想影响到我哋。」见日日喺网上被狙击的Timo获一众战友、导师力撑，不少网民也表示「误会Timo了」，并大感同情兼扬言不再「反Timo」，大家更纷纷于社交平台留言：「佢话『有信心都唔敢讲』呢吓我有少少同情佢，佢呢Round真系冇自信到谢晒」、「其实佢都好惨㗎，被网民狙击到信心都冇埋」、「佢应该睇到大家啲留言之后，都收敛咗」、「佢可能都唔系咁衰，系被剪接组剪到咁」、「本来唔锺意Timo，但佢讲番反省说话令我接受番佢」等，更有人鼓励Timo「快啲畀番啲自信自己」，大赞他于前哨战表演好Charm，相信经历《造星III》比赛后，Timo会变得更好。

突击Check手机
正如右雨和彭秀慧所讲，其实Timo态度一啲都唔寸，好似早前《头条娱乐》记者进行突击大搜查，Timo都好听话即刻交个背囊出嚟畀我哋开箱，过程中仲见识到佢「怕丑仔」兼「文青龙友」一面。嚟到最后一集，《头条娱乐》决定即场Check埋Timo手机！

曾经喺「快问快答」环节讲过「成日唔记得覆WhatsApp」嘅佢，到底有几多Message未覆？除咗WhatsApp，仲会公开埋Timo最新下载嘅3个App及最近狂Loop嘅歌。最搞笑系，私密嘢忽然攞晒出嚟畀人睇，平时「牙擦擦」嘅Timo唔知系咪惊得济呢，竟然中途唔觉意「爆粗」，搞到全场爆笑！咪睇Timo喺节目入面寸寸贡，私底下其实都系一名「暖男」，对一班「Tim饭（Timo粉丝称呼）」仲好上心，究竟佢点Warm法呢？又系咩歌令Timo怕丑拒绝表演呢？想了解Timo嘅真实一面就快啲去片啦！