【独家】《造星III》30强止步唔气馁 林咏伦搏到翻身收入返晒嚟

40岁嘅E-kids成员林咏伦（Alan）未能跻身《造星III》30强，搞到林二汶喊爆自责唔系一个好导师！虽然未去到10强目标就止步，但Alan态度正面：「对我系解脱，得到好多爱，搵返我自信，得到好多尊重！」Alan仔仲约埋一班落选战友开心gathering，饮完靓汤再食盆菜，明年Alan开音乐会仲预埋佢哋玩。 采访：方骞平 摄影：李维隆

日前林咏伦约咗被foul战友，女神郑嘉欣(Christine)、罗振峰(Vincent)、泰伦斯、小新(许绍燊)、JD(戴铠霖)及阿拼(翁炜桐)gathering，Alan特地送上自家老火汤嚟慰劳大家过去嘅辛劳，林咏伦继续做「烂gag王」，笑说：「唔foul嗰啲冇汤饮，佢哋饮恨啦！」笑爆全场。

Alan形容今次参赛得着多过唔开心，「节目入面演《给十年后的我》成功留低咗一个好作品，网民由初头叫我收皮啦！到后期赞我无论喺身形、发型都有好大转变，好想继续睇我，最感动系话，由今日开始记得E-kids入面有个Alan，所以我会继续行落去。最意外系强尼大哥一句『Alan回春』，𠵱家有好多保健品广告，就算喺疫市下收入比以前激增3倍，仲有主办单位搵我明年开音乐会，到时会益埋战友及E-kids旧队友。」

检讨参赛得失，JD当自己毕咗业，二月会出hip hop歌；Vincent话初时系有啲气馁同埋唔开心，幸而观众见证到他有努力过；泰伦斯觉得早段被淘汰先系嬴家，因为参赛好有压迫性，稍后他会同Mark一齐出歌；小新乘机做歌送畀战友，新歌讲其实失败唔系一件可怕事；Christine有失恋空虚感，但最感动被foul后，竟有男工作人员跪地向评判求情；阿拼认为其实输赢唔重要，拎到嘅系将来会成为一位更好嘅演出者。他们一致睇好大热ANSONBEAN系今次冠军，小新仲大赞他好有魅力，好似吉祥物咁有亲和力。至于陈苇璇则坐亚望冠，她既稳阵又有战斗格。