【独家】【Timo Manson被Foul】《造星III》十强名单漏出花姐唔否认只强调冇造马

2020-12-09 03:00

搞到TVB要变阵的ViuTV皇牌节目《全民造星III》前晚(7日)由40强去到30强，前四局分组表演中，A组和B组2比2平手，需透过「终极生死战」定输赢，结局大家都睇到，A组在生死战以1:4落败，导师林二汶要忍痛大Foul六名成员，网民疯狂闹爆评判梁文礼及C AllStar成员钊峰等，指结果造马，扬言《全民造星III》以后要叫《全民造马》。闹爆声中更有熟知《造星III》内情的网民懒理剧透被咒骂全家而在连登大爆十强名单，《头条日报》记者即拎名单向节目话事人花姐查问，回应系:「真定假，唔会讲啦。」咦，冇否认喎。撰文:金泰亨

因为疫情影响，今季《全民造星III》较以往两季更多人睇，自节目播出后讨论度超高，连圈中人如张敬轩、张继聪、陈柏宇及郑伊健等都有追睇。30强于前晚终于诞生，二汶揸旗的A组输比赛但赢民心，大量网民在ViuTV社交平台派嬲及留言狂闹表达不满，「还我A组」、「有无搞X错」，不少人仲话要罢睇，群情相当汹涌。

再见Timo Manson
十强其实于11月尾已有结果，ViuTV将于12月最后两星期公布，总决赛已定12月26日举行，会否安排观众入场要睇疫情才决定。既然十强已选自然有人知，有唔生性网民就冲出嚟爆，在连登公开十强名单，分别系NY、ANSONBEAN、叶巧琳、CY、Alina、Kimman、KLau、Ben、陈苇璇及Cloud。咦，Timo呢?Manson呢?CY?????????唔好啦。

记者即拎名单Wtsapp花姐，问佢究竟坚定流?畀人闹咗一晚「造马」嘅花姐并无否认，「我有听闻，不过真定假，为咗观众，唔会讲啦，只知我同两个导师，强尼都会留到决赛。」再问会否捉内鬼?花姐就话，「如果有，你可以叫内鬼话俾观众知，全民造星从来都冇造马。」好一招四両拨千斤，一嘢就回覆埋一众不满A组输咗嘅网友，而回应中花姐Post咗两个笑到喊嘅Emoji，应该笑嘅，全民中晒造星毒，仲搞到对家要变阵，瞓着都笑醒啦，系咪呀花姐?