【独家】新歌主动写词吓窒监制 Anson Lo@MIRROR自爆中学俾女飞

Anson Lo（卢瀚霆）继《一所悬命》后推出第二首单曲《Burn Out》，更首度亲自作词。他坦承最初主动话负责写词而吓窒监制，幸好最后靠香薰蜡烛搵到灵感，更自爆创作时想到中学跟同班女同学拍拖惨被飞经历。另外，Anson近日再有新尝试，就是远赴台湾拍摄首部偶像剧，他坦承起初好紧张，幸好早前经过拍《男排女将》训练，令他对演戏兴趣大增。撰文：杜淑霞 摄影：李维隆 发型：Lydia Yung&Denny Ku@Chic Private I Salon 化妆：Giann,Cori @Annie G. Chan Centre 服装：D-Mop 场地：JAS Party&Studio

这次作词决定原来是Anson听完Demo后主动向监制Edward Chan提出，不过这举动竟吓窒了对方，「佢话『吓！』我话系呀真系好想作，可能OK。佢就覆我『OK!wait for good new.』但我突然觉得好大压力，如果返嚟嗰个唔系good new咪死梗，但系我觉得既然想作就作好佢啦！」

Anson限自己一周内要完成歌词，但想了几晚都未搵到主题，一晚打算放弃吹熄香薰蜡烛去瞓，反而得到灵感，「突然间啲烟冒起，一吹就熄咁鬼易嘅，好似一段关系咁，令我突然谂起中五、六一段感情，我同个同班女同学拍拖，唔系初恋嚟，我谂半年度佢就突然间同我讲分手，系SMS讲但冇原因嘅，我觉得好无奈，keep住SMS轰炸佢，但佢唔覆，返到学校佢又当我好似陌生人咁，我同佢讲嘢佢又唔睬我，我觉得分手唔紧要，但起码畀个原因我。可能好多人试过呢个经验，或者分手后好想同嗰个人一齐返，好多人会有同感，所以我就用咗蜡烛同分手挂钩嘅一个主题。」



Anson近日已飞到台湾拍偶像剧《超感应学园》，他承认早前演出《男排女将》对今次演出有好大帮助，「拍《男排》角色对白多好多，一开始我太紧张，集中唔到又享受唔到，口又震晒，大家笑我好chok，又话个偶包（偶像包袱）仲喺度，我唔系专登chok，因为太紧张嘅氛围，唔可以好似正常人咁讲嘢，去到中期好咗好多，令到我觉得记剧本唔系一件咁难嘅事，一开始通知去台湾都惊，但拍完《男排》对拍剧大兴趣好多。」