【独家】首撰曲词监制向花姐赞好 Ian@MIRROR似见家长过关

MIRROR成员Ian（陈卓贤）最近推出第4首单曲《鲸落》，首次包办曲词创作，他笑言得知监制王双骏向花姐赞他写得好，感觉似读书时见家长过关。Ian又构思歌曲MV以动画形式呈现，在疫情下决定利用募集粉丝画作，令粉丝能够一齐参与，而早前出post晒肌，就是趁机答谢fans。本身是周星驰迷的他，又开心自爆将会演出喜剧，试镜时凭住碌地而获得导演垂青。撰文：杜淑霞 摄影：梁志明 形象：Felix Wong ,Daniel chu 发型：Denny Ku @ Chic Private I Salon 化妆：Rainbow Chung @Annie G. Chan Makeup centre 服装：Hugo、Diesel 场地：The Stadium

今次Ian先写好曲，再获得监制王双骏批准亲自写词，他就将自己看到一篇网上文章了解到鲸鱼死后沉落海底，不但成为其他鱼的大餐，更为海床带来很多养分，「鲸落」是牺牲也是成全，就将这份凄美感觉化成歌词。他最初都担心能否顺利过监制一关，「佢冇特别comment话好定唔好，后尾我知道，佢有同花姐赞过我，自己好开心。（好似老师见完家长咁？）直情系咁，因为老师平时唔会点赞人，原来同家长讲几好喎！嗰吓系好开心嘅，好大鼓舞。」

写完歌Ian已构思好MV用全动画，就像卡通电影一样，「觉得呢首歌好似几啱，出到嚟好唯美、好凄美咁样。（又难搵到鲸鱼嚟拍？）哈哈！都系嘅，同埋呢首歌太写实唔系太啱个感觉。」因为疫情他更想到邀请粉丝一齐参与，「想同fans一齐去完成个MV，于是就招募大家嘅画作。」由于反应太热烈，收到逾千份画作，虽然MV未能全部用上，他考虑年底MIRROR演唱会时会再想方法用。不过为了答谢fans，他早前激罕在网上晒肌，「见静静哋同大家分享吓罗！」他坦承为新剧《男排女将》，操得比做运动员时线条更fit。




本身好锺意睇喜剧的Ian，又自爆将会首次拍喜剧，角色同自己一样爱挑战新事物，「我系负责古露精怪碌晒地嗰啲嚟，导演话点解拣我，因为我casting嗰时，有一幕我冲入去就直接碌地，导演就话睇你个样估唔到你会做啲咁嘅嘢，所以你应该可以做到呢个角色。佢同我对紧戏时，已经问我『你系咪好锺意睇周星驰』我话系，所以佢觉得我做呢个角色应该OK，所以拣咗我演呢套戏罗！」他又解释私底下有搞笑一面，「我私底下同啲朋友相处，譬如同MIRROR啲兄弟倾偈，其实我都系搞笑居多嘅，唔系大家睇到我唔出声好静。」