【独家】为宣传新歌险中招 Jer@MIRROR拍MV撞伤头见红

MIRROR成员柳应廷（Jer）早前因与确诊新冠肺炎的ViuTV工作人员开会，搞到差点中招，好彩最后病毒检测呈阴性。其实Jer最近频频返公司开工，因忙于宣传第二首个人单曲《回光物语》，为了拍该歌MV除了出动到花姐和队友Anson Lo帮手，他仲搞到差点遗失心爱戒指，甚至搞到头顶撞伤见红，但效果好辛苦都值得。Jer亦承认出单曲是很好锻炼，最重要学习独自承担压力。撰文：杜淑霞 摄影：李维隆 发型：Denny Ku @ Chic Private I Salon 化妆：Giann Cheung @Annie G. Chan Makeup centre 服装：YOOX

今年打算推出3首单曲的Jer，继上次以水做主题的《水刑物语》，今次就用光去延续这个故事，「因为第一首歌都系有光嘅出现，呢个光系将我由水底拉返上水面，第二首歌系想讲你上咗水面之后，呢个光唔见咗，你点样喺黑暗环境行落去。第一首歌最尾都讲到『茫茫宇宙某颗星斗』，咁不如第二首歌就讲我跌落咗银河系某个故事，又可以承上接下一个续集，观众听起上嚟都可以听埋第一首歌，好似当电视剧咁睇有故事性。」

为了营造这种与世隔绝感觉，Jer特别前往邻近边境的莲麻坑矿洞为MV取景，他好感动平日不做运动的花姐先陪他行足两个钟山路去睇景，之后队友Anson Lo更亲身陪他去拍摄。除在酷热天气警告下拍摄，令工作人员中暑外，Jer更差点连心爱的戒指都遗失，「最尾一幕系要掉灯代表打破自己框框，呢幕我唔小心掉咗只戒指出去，系我自己好锺意同好贵，搞到啲工作人员帮我喺个石滩度搵咗15分钟，好彩搵得番。」最后Jer更搞到见红，「我喺第二个拍摄点行返出嚟差啲晕低，因为嗰度有个洞要经过，但洞口太低我撞到个头好痛，返到屋企洗头发觉原来擦损咗仲流血。」




向来比较怕羞的Jer，认为推出单曲是很好锻鍊，特别在抗压方面，「一个人唔会有其他兄弟帮你分担咁多批评，衰就自己承受晒，就系Jer你做得差，所以要做得更加好。」对自己唱歌要求高的Jer，更自爆演音乐剧《如果只得一分钟》时失准，搞到在后台对着花姐喊，「当下我系唔开心，但系我要尽快调整自己心态，夜晚嗰场做得更加好。live表演就会有好多唔完美，你要接受嗰啲唔完美。」