【独家】古天乐马浚伟出钱出力 林子博拍真人骚为癌妻而战

患有「平滑肌肉瘤（腹腔）」嘅林子博太太董燕君（Shirley），最近因为肿瘤痛，食完含有吗啡成份嘅强力止痛药后又晕又呕，辛苦到落唔到牀，要入院接受治疗同埋重新调校药物份量。目前Shirley已回家休息，老公林子博可以专心拍摄综艺真人show《大叔要变身》，希望操fit body为癌妻而战。 采访：方骞平 场地：productionFL

林子博嘅外判综艺真人show《大叔要变身》共10集，将于年尾喺香港开电视77台播出，除咗记录子博大变身及瘦身过程，仲会邀请嘉宾朋友跟他对谈：「因为瘦身只系讲外表，变身系由内到外，心态同生活上嘅改变，畀人睇到重新出发。以前我得140磅，好瘦吓，系老婆口中嘅靓仔，自从有家室后就开始放肆，最高纪录有165磅，肥到一个波咁，因为我食得好夸张，可以队成罐薯片加埋雪糕，最爱梅菜扣肉、海南鸡连鸡皮食。」

努力减磅为家人
因为饮食唔节制，49岁嘅子博经已出现「三高」，身体响起警号：「𠵱家我嘅健康系属于屋企人，因为靠我一个人搵食嘛，同埋做幕前又唔可以太离谱，𠵱家跑步、做健身加埋节食，暂时减咗5磅。」原来节目系Shirley打畀相熟导演倾返嚟：「去年10月离开TVB，到今年4月未开过工，太太有病焗住停工，唔担心就奇，不过，我都成日叫佢唔好担心，冇嘢紧要得过健康。虽然经济只系『掹掹紧』，但我有电单车牌，送外卖仲得。」

他又大赞古天乐及马浚伟有情有义：「今次太太入院，古生Keep住有打嚟慰问，问『有乜可以帮到手？』佢好好，好有心，仲介绍佢个主诊医生畀我哋，叫我唔使担心(诊金)，睇咗先。其实关心同问候帮到我减轻唔少压力。除此之外，马浚伟承诺，无论开电影、舞台剧都预埋我。」