【新冠肺炎】唔希望喺呢个时候冒险马浚伟宣布舞台剧延期

2020-08-17 09:45

由马浚伟(马仔)监制、编剧、导演、演出兼出品、黎瑞恩主演的舞台剧《男人40 CEO》，原定9月11日至9月26日喺艺术中心公演10场，惟第三波新冠肺炎疫情反覆，亦受限聚令影响入场人数，昨晚马浚伟宣布《男》剧将延至明年6月11日至6月26日演出，以确保观众、表演团队与工作人员安全及健康，门票退款的安排将于8月25日公布。

马浚伟拍下片段交代延期一事：「由于近日香港嘅疫情依然非常严峻，而每日嘅感染个案依然有双位数字，虽然偶有回落，仍然系非常唔稳定。我经过连月来一直有考虑，我觉得，关顾到所有人嘅健康，包括观众、台前幕后嘅工作人员、演员，我都唔希望佢哋喺呢个时候有一个冒险，聚集咗好多嘅朋友一齐去睇呢个舞台剧，所以最后决定延期。」

「我好感谢每位买飞嘅朋友，特别系6月嘅时候开始预售，到7月公开发售时，我哋嘅飞卖得非常之好。虽然喺限聚令下，我哋只能卖一半门票。其实我之前曾经讲过，如去到8月中、下旬只能卖一半，再加上疫情系严峻，我哋系冇办法做落去嘅，所以各方面考虑，当然最重要系观众、演员、工作人员，所有人安全，大家嘅健康系我最首要考虑，场地同我哋成个团队成员沟通过后，感恩大家非常支持我哋呢个决定，大家达成好协议，决定将《男人40 CEO》延期至明年6月11日到6月26日。」

「当然系原班人马，大家唔使担心，所有都一样。始终唔能够冒呢个险，不能因为我哋嘅演出，而增加感染或被感染嘅风险，亦唔可以增加医护界嘅负担同压力，呢个系我哋嘅责任，作为一个剧团及公司负责人，我哋系有呢个责任唔可以畀呢件事发生。我知道好多朋友想睇我哋嘅演出，因为套戏真系好好笑！」

马浚伟还表示，会先将款项全数退回畀已购票嘅朋友，预计明年3月中、3月尾开始卖飞，大家到时再去买过。