「生蛇」反遭诅咒　黎瑞恩嬲爆跟网民骂战

2020-08-18 11:08

黎瑞恩（小恩子）日前喺社交网站上载烂面相，自爆7月23日开Live后不久，「生蛇生上眼」，条蛇搞咗她成个月，病情反覆，又痒又肿又痛，仲生晒水泡，苦不堪言，幸而病情经已向好。不过，有政见唔同嘅网民乘机发炮，甚至向她恶意攻击及诅咒。

对于有网民喺「伤口洒盐」，47岁小恩子原来仲好好火，被辣㷫的她噚晚喺社交网站发文还击：「哗哗哗，睇到一班人充满仇恨、满口恶言、心肠歹毒、讲嚟讲去三幅被嘅留言，真系唔好意思呀！我真系笑咗罗！我只系生蛇啫，我仲未死，咁快就开心到咁？不过唔紧要啦！发泄吓都好嘅，做人最紧要开心，你哋嘅祝福，上天一定睇到嘅。#唔想骂战#承唔到你哋贵言#非常难过」唔少粉丝留言力撑安慰她，叫她要多休息，小心身体，不要动气，时运高睇唔到、左耳入右耳出、不遭人妒是庸才…