疫情反弹唔谂太多 雷有辉：当如期开骚咁做

太极乐队主音雷有辉（Patrick）将于下月在西九文化区戏曲中心开骚，但香港疫情近日反覆，Patrick受访电台节目《有谁共鸣》，谓以积极态度筹备音乐会：「其实个骚本来4月举行，延期咗一次，所以我都唔谂太多，要睇疫情发展同限聚令会点先知有冇影响，但一日未有公布，都要当如期开骚咁做！」期间广播道巧遇张松枝，二人惺惺相惜，Patrick更送上海报予对方，他表示因限聚令延迟乐队彩排：「依家月尾先排Band啦，不过全部都系高手，一埋位就夹到，次次排歌似朋友聚会多啲，咁月尾先啦！」
Patrick表示一直跟主办开会，对方亦加强卫生措施：「之前都讲过现场会探热、派口罩，今日佢哋话所有入场人士，都会经过消毒喷雾，总之都系想大家睇得安全同安心，所以未来7日大家乖乖地，唔好周围走啦！」
Patrick在节目中还分享歌单，更将善款捐到香港防止虐待长者协会。Patrick谓近日留家抗疫，与儿子听黑胶打发时间：「唔知点解，呢排个仔锺意听旧歌，所以我搵Hi-Fi德（刘贤德）帮手买部二手机，真系抵到烂，政府派嗰一万蚊都够埋单，所以两父子一齐研究。虽然就停工冇收入，不过增进父子情，咩都系值得！」