【独家】跟陈茵媺似初恋 同仔女黐到实 陈豪亲教一家五口sweet爆秘诀

陈豪（阿Mo）最近在新剧《杀手》饰演「杀手之王Zero 」风流成性，沟高海宁又冧李佳芯，不过现实中阿Mo堪称是廿四孝老公兼好爸爸，一家五口出名sweet到爆。早前《头条》就影到他同老婆陈茵媺（Aimee）拍拖食雪糕，结婚7年竟然仲好有初恋feel；而他虽然好鬼忙凑仔时间唔多，但三个宝贝仔女依然同佢黐到实。究竟面对「七年之痒」仍同老婆关系保鲜，跟仔女又咁好感情呢？阿Mo呢个一家之主就自有一套维系家人感情秘诀，首先两公婆一定唔可以有亲情冇爱情，夫妻好感情仔女自然学识点样爱锡人；而不论同老婆定对仔女一样离唔开肌肤之亲，揽揽锡锡绝对唔少得，咁样一家人自然日日都sweet爆啦！撰文：杜淑霞 摄影：李维隆 服装：Harrison Wong

阿Mo在10年跟拍拖两年的Aimee 结婚后，接住生了6岁的大仔梓烨（Aiden Joshua）、5岁的二仔陈浩锋（Nathan Lucas）和4岁的细女凯婷（Camilla）。最难得结婚7年，早前阿Mo拖住Aimee去中环拍拖，仲不停如痴汉般甜望老婆食雪糕，完全是初恋Feel，提起他即狂笑，仲话因为Aimee平日要照顾三个小朋友太辛苦，「所以当我得闲，我就尽丈夫嘅责任，陪佢出街，行街shopping咁，做少少嘢令到佢开心系需要嘅，（佢食雪糕就得好易𠱁！）yeah！哈哈！」

肌肤之亲好紧要

之后阿Mo再教维系家人感情的秘诀，「其实大家遗忘咗丈夫同太太系第一个关系，父母同仔女系第二个关系，大家千祈唔好屋企得爹哋妈咪同细路哥，唔系罗！坦白讲夫妻感情愈好，家庭里面愈开心，愈多爱细路仔啲性格先至愈光亮，先至会开心，我哋好深信呢个理论嘅，所以我同Aimee其实有个承诺，每年去个二人世界嘅trip，我想将我哋之间嘅爱维系住，等屋企充满住爱，所以我哋好注重揽揽锡锡，表达同对方嘅爱，我哋经常做，就系想啲细路学识咩叫爱。」

至于平日又要拍剧又要打理咖啡生意，阿Mo凑仔时间唔多，但三个仔女依然好黐佢，阿Mo就再教路，「小朋友黐我哋，因为我哋好黐佢哋，我哋想同佢哋一齐，佢哋先会想同我哋一齐，先会同你friend，呢啲就系爱，我哋经常bye bye前锡锡，临走前又锡锡，变咗佢哋肢体上会多啲接触，会走嚟坐大髀，嗰种肌肤之亲都几紧要㗎！」

囡囡入行会支持

讲到《杀手》中，阿Mo不时沟女，但原来只要有咀嘴场面，Aimee就自动唔睇，「拍之前有话佢听，但佢唔睇㗎！佢宁愿唔睇，冇眼睇，哈哈！我同佢都好明白大家做演员嘅，就算佢做都好，我都会支持佢，叫佢放心去做，唔好有咩顾忌。不过调返转我都一样，梗系唔睇啦！（《杀手》有冇咀戏？）冇嘅，佢成套都可以睇，哈哈！」至于阿Mo的经典三级背部全裸之作《晚九朝五》，Aimee一样未睇，「真系未喎！（晚年同佢一齐睇？）唔会啦！你咁激嘅！（同小朋友一齐睇？睇爹哋几好身材！）哈哈！佢哋唔会啦！（有心理准备小朋友将来睇到？）其实都冇乜所谓，我哋做得幕前，预咗畀人哋分享，做演员就系咁样，好嘅唔好嘅都放咗喺荧幕上，大家自己评定。」

由于阿Mo三个小朋友太细，暂时未睇过他的作品，不过对他工作就超好奇，「我开工有时会特登拍啲片畀佢哋睇，佢哋睇得好开心，囡囡又成日都话要跟我去片场睇我拍戏，但仲未实现佢呢个梦想。」阿Mo承认好似迷你版Aimee的囡囡将来有可能入行，「佢真系超级贪靓，佢天生㗎！妈咪化妆、整头发，搽唇膏、整指甲，特别锺意，咁细个自己拣衫出街，我调返转头问佢意见，佢又答到我，佢taste都唔错㗎！（步你哋后尘入行？）女大女世界，我哋做父母嘅，好好准备佢哋面对佢哋嘅将来，起码读好啲书有个好好基础先，到时做咩自己再选择，将来靠佢哋去闯，作为Daddy做咩都会支持。」