唐麗球自爆伸脷錫莫少聰 被唱通街冇人再搵拍咀戲

久未露面的唐麗球（波波）受訪開電視節目《開工大吉77》，與好友苑瓊丹分享圈中秘密。波波稱當年赴台拍劇，全因舊公司拒加人工：「當年開份約畀我，簽5年、6千蚊一個月，我求佢話加多500蚊畀我啦，佢哋都唔肯，咁我咪走去台灣囉。當時人生路不熟，都冇換台幣就出發，第一日唔使拍嘢，點知等等吓肚餓，但周圍都唔收港幣，最終等劇組收工返嚟接濟我。」

波波謂當年與莫少聰拍接吻戲，但烏龍百出成為佳話：「依家講返都唔好意思，當年第一次拍Kiss戲，唔識點樣做咪真係錫囉，事後阿聰周圍同人講，波波條脷好勁，將噚晚條菜都挑埋出嚟，從此都冇人搵我再拍呢類鏡頭啦。其實呢啲醜事都唔想講，因為苑仔我先肯再提。」

苑仔稱跟波波丈夫吳毅將相熟，故一直得知對方近況：「佢哋都好Sweet，不時都會通電話報告近況，其實都識咗30年，真係嚇一跳。頭先佢提個女出國讀書都喊出嚟，證明佢母愛幾偉大，佢笑自己老年得女，所以好寶貝。」