【闪到盲】被质问唐老鸭同女友跌落水救边个　马国明汤洛雯一早起身打情骂俏

汤洛雯（靓汤）和马国明（马明）今朝一擘大眼又放闪喇！话说昨晚靓汤于IG贴出一张穿唐老鸭Tee的靓相，心水清的网民都知道马明是唐老鸭Die-hard fans，仲疯狂到直头视它为家人看待！见到靓汤暗地里放闪，一众网民即刻起哄大赞Sweet爆，大家都估二人一齐拍拖出街，又问件衫系咪男友送？隔咗一晚，刚才靓汤就于IG再连出两个Po，都系「靓汤与唐老鸭Tee」系列的照片，靓汤留言：「When I look into your eyes...」马明都识做即Like兼留言，仲俾咗个眼望望加独角兽的emoji，唔通呢张相就系传说中的「男友视角」？尝试放大张相睇，就睇唔清眼里的倒影是否马明嘞，不过网民们就纷纷表示喺靓汤眼里看到爱喎！

至于另一张相，靓汤就笑到见牙唔见眼，她留言：「Whats so funny?」马明继续指定动作即Like兼留言，认真捧场！不过，今次马明就写下一只字：「鸭……」然后再加几个笑到双眼发光的emoji，好蛊惑，究竟他想表达啲咩呢？冇耐谜底由靓汤解开，她爆笑回覆：「其实鸭系识游水嘅……」原来马明系回应紧昨日本报报道中嘅问题－－靓汤同唐老鸭跌落水会救边个先？有网民都帮手留言「质问」他点拣，事关当年马明喺访问中讲过：「有机会为唐老鸭而放弃女友。」如今他的选择居然系救鸭，返去等跪算盘喇！