【头条独家】有男有女去睇戏麦子乐强调女友人系朋友

2019-12-18 22:00

下个月40岁的麦子乐呢期忙为ViuTV新剧《地产仔》开工，日前放假就约埋老友周祉君同一男一女友人去铜锣湾睇戏，睇戏前行阵街，麦子乐发现记者，为怕记者误会佢同女友人系一对，主动同记者讲:「朋友嚟㗎咋。」哦。采访:梁志明

同过佘诗曼传绯闻，39岁嘅麦子乐出身自无綫04年训练班，同期同学有胡定欣及黎诺懿，一个系视后，一个有自己节目，当年有「翻版林峯」之称嘅麦子乐早已逃离TVB向外发展，去过港视拍剧，又签咗古天乐旗下经理人公司，近年影视齐发展，同郑秀文拍《花椒之味》，又不断为ViuTV拍剧，算搵到食。

咁惊咩?
因为麦子乐喺《地产仔》中要饰演烂挞挞的装修师傅，导演要求唔会着太多衫，要骚肌同好麻甩，所以本来已系大只仔嘅佢再刻意做运动操肌及节食减肥。日前傍晚6点，好大只嘅麦子乐同周祉君及一男一女友人现身铜锣湾，一行四人去咗柏宁酒店附近睇眼镜，然后再去翡翠明珠广场买飞睇《神探白朗:福比利大宅谋杀案》，发现记者嘅麦子乐好担心，担心咩?担心身旁女友人会被误会同佢有Road，所以主动同记者讲:「朋友嚟㗎咋。」咁咪叫无私显见私罗。