【头条独家 】失落三甲女友力撑冧晒 《造星II》Tank原来想唱《今期流行》

ViuTV真人骚《全民造星II》终于完满结束，大热门Phoebus(吴启洋)夺得冠军，MC(张天赋)及Oscar(李祉均)分夺亚、季军。赛前大热，29岁的Tank(梁德忠)虽然输咗，排名更只得第8，但佢一啲都唔Sad，拥有一把地狱歌声嘅Tank仲非常满意Part 2唱跳《全日爱》部份，原来佢曾经想唱古天乐嘅《今期流行》，咦，反而想睇喎。采访:廖思慧、杜淑霞

去年因有工作被迫退赛《造星》的Tank，因心有不甘而卷土重来，而《造星II》节目播出而来Tank都是节目焦点，总决赛中，Tank一开始便晒冷，Show肌同女友大跳限制级意淫舞蹈，全场哗声四起，而Part 2唱跳《全日爱》即时比下去，问Tank觉唔觉排错次序?瘦剩个头嘅Tank唔认同:「想喺第一个表演有更大信心，所以就将最有信心嘅跳舞放前面。」

问到点解拣《全日爱》？Tank表示想拣一首快嘅广东歌配合唱跳，之前都有谂过几首歌，但因版权倾唔掂而打消念头，例如《今期流行》，Tank讲歌名时感觉有啲唔好意思，咁尴尬咩?赛后检讨，Tank自评唱歌有8.5分，因为系参赛以嚟唱得最好嘅一次。「彩排都有好多虾碌。」

至于令全场叫到哗哗声嘅限制级舞蹈部份，Tank透露概念谂咗两星期，「好多谢排舞老师帮我将想法实体化。」表演尾声时，台上有个架，多对男女在架上「动作连场」，「彩排嗰阵先第一次试个架，之前全部凭空想像出嚟。」对于失落三甲，Tank无失望，因为得女友力撑，「女友赞掂呀，话我今日表现最好。」阿Tank眼湿湿表示好窝心，叫「造星II眼浅王」唔好喊，佢话已忍住「我点解咁容易喊，因为身同感受，成日感情用事，将最样衰一面表露出嚟。」

问到点多谢女友仆心仆命支持？Tank笑言要返屋企跪玻璃，「因为女友唔喺香港，要同其它女仔彩排，女友睇咗啲片，我好惊，佢话:『你揽第二条女？』」最后佢多谢《全民造星》，更如释重负地抛吓一句，「终于完」。