【头条独家】木口木面孤独行街 陈逸璇瞓身拣枕头

现年37岁的陈逸璇（Jolie）自两年多前，跟墨西哥籍丈夫Marc Rodriguez离婚后，重新投入幕前工作仲唱番歌，虽然她早前公开表示不乏追求者，但事隔一排似乎都冇乜声气。日前，冇Friend又冇男友陪的Jolie独自现身铜锣湾，更于家品店瞓身拣枕头，惜最后都是运吉冇帮衬！采访：梁志明

陈逸璇前年宣布跟墨西哥籍丈夫Marc Rodriguez结束两年多的婚姻，回复单身后，她亦重拾歌手身份，于今年暑假先后推出《短暂的新分》及《良品》两首新歌，当中仲大方分享失婚心情，一个多月前出席ViuTV音乐节目《Chill Club》时，Jolie更直认已有追求者，不过二人有否挞着呢？估计暂时都是「坏消息」居多！事关见Jolie近月在ig Po的照片，不是工作照、就是孖住闺密或家人周围去，似乎都唔觉有乜恋爱迹象！

玩转家品店冇帮衬

　　少咗个枕边人陪，唯有去买番个靓枕头挨吓啦，早前本报就发现Jolie孤零零现身铜锣湾行街，一身黑白运动Look、戴Cap帽的她，于傍晚约6点几急急脚走进利舞台附近一间家品店。其间，热心的女店员向Jolie逐一介绍啲枕头，如人体工学类，要过千蚊一个，惟她全程木口木面，好似冇乜心机咁。之后，她又瞓喺牀上左试试右试试，可惜扰攘咗15分钟都拣唔落手，最终还是两手揈揈离开，认真「搞搞震冇帮衬」！