【头条独家】出巡行街晒温馨 梁咏琪杨爱谨 老公奉旨接「收工」

梁咏琪（Gigi）和杨爱谨（Miki）自升呢为人母，Gigi一路Keep住做嘢兼开铺做生意，仲要凑埋4岁长腿女儿Sofia好鬼忙。相对Miki就叹得多，嫁咗畀永安太子爷郭永淳（Edwin）嘅佢，三年抱两凑成个「好」字，不过凑住两个一样好似返工咁忙。早前两位靓妈先后现身铜锣湾利园商场，Gigi带住Sofia巡完铺再去行街睇衫时，Gigi西班牙籍老公Sergio突然现身畀意见兼接她们离开。轮到Miki，她都系凑住两岁囝囝Luken行完街，老公Edwin忽然出现陪两母子游商场兼等车回家。两位人夫都好Sweet呀！
采访：梁志明

43岁Gigi去年开完演唱会，原本话想追多个B，等Sofia有个伴，点知佢跟住又同老公开咗童装店，仲有两间咁多，加埋拍戏同个唱等工作，Gigi真系分身乏术！至于34岁的Miki，曾笑言凑住两岁囝囝Luken和8个月大的囡囡Emma，仲辛苦过连踩19个钟拍戏，她解释以前做嘢系俾人照顾多，现在她却要落手落脚去凑小朋友，既要照顾两兄妹的起居饮食，又要陪他们玩斗智斗力，她曾苦笑说：「真系从未如此辛苦过！」两位靓妈咁辛苦，做老公嘅又点可以冇啲表示。

帮手睇女
早前Gigi带住女儿Sofia到利园巡完铺，再过隔离的时装店45R睇衫。只见Gigi锺情长裙，而Sofia都好乖巧，一路玩住汽球一路站在妈妈身边等候。当Gigi入去试裙时，老公Sergio突然现身，除咗即刻帮Gigi睇实个女，又会帮手畀下意见。搞咗大约半个钟，Gigi终于买到心爱嘅长裙。此时Sofia等得耐觉得攰，爸爸即刻抱起她、安抚她，等Gigi可以安心去畀钱。离开时，Gigi负责拖女，而Sergio就梗系做阿四帮手拎嘢喇，体贴程度攞满分，难怪Gigi有老公在身边一直甜笑，So Sweet！

Call车走人
一向话凑仔唔假手于人嘅Miki，日前带住两岁囝囝Luken去利园行街，行到傍晚，老公Edwin忽然出现，除咗帮老婆拎咗袋战利品，又即刻打电话Call车返屋企，可惜座驾迟迟未到。只见Luken企唔定郁嚟郁去，又不时企上妈咪对白波鞋度劲贪玩。Edwin怕老婆辛苦，叫太太囝囝坐埋商场石壆等候，够晒贴地，其间佢揽实囝囝陪佢玩，等Miki可以松一松。之后他觉得一直等唔系办法，索性入番商场行。上商场楼梯时，Luken跣脚差啲跌低，好在Edwin够眼明手快扶起囝囝。老公「护驾」有功，Miki自然舒服得多！