【头条独家】三岁囝囝唔饿得车婉婉快买面包赶返归

2019-12-05 17:30

17年3月，当年42岁嘅车婉婉诞下囝囝Justus Quinlan(乳名BBQ)，囝囝生得又白又滑又肥嘟嘟，非常得意，所以佢好多Fans，全靠婉婉喺ig以「高龄日志」分享凑仔点滴，BBQ食过乜着过乜边度流过血，一揿佢ig就一清二楚。从而知道BBQ好锺意食嘢，食量仲非常之厉害，所以就嚟三岁嘅人仔非常高大同壮健。日前下昼三点，婉婉喺铜锣湾做完嘢再去崇光超市买面包，面包盘放满晒，囝囝有排食。采访:梁志明

有啲星妈星爸好低调，唔想仔女个样曝光，有啲就好锺意同人分享仔女嘅成长趣事，好似coffee啦，李璨琛老婆啦，同埋车婉婉，老实讲几好睇嘅，好似婉婉会post好多囝囝嘅第一次，第一次去海洋公园，第一次坐缆车，第一次脚趾受伤咁，睇得多好似同BBQ好熟咁，感觉好得意。

BBQ锺意食包
当日下画三点，发现着住长身外套露长腿嘅婉婉喺便利店增值，然后去崇光超市买面包，排队畀钱条龙好长，但婉婉依然继续买，见佢拣咗5分钟，买咗一盘面包，内有小蛋糕，有馅同无馅嘅面包仔，仲有一袋六件嘅小面包，全部细细件，啱晒BBQ一手拎住慢慢咬。拣包5分钟，排队畀钱10分钟，买完就行去百德新街搭小巴返宝马山寓所。