【头条独家】同麦包首带C9赴台旅行 金刚担心女友唔肯做师奶
2019-12-05 23:15 
麦包（麦长青）和金刚最近拍住主持ViuTV新节目《C9旅行团》，带住班师奶玩转台湾。他们赞首次跟ViuTV合作感觉比娘家TVB自由度更大，但未有担心不能再现身娘家，仲话想仿效黄淑仪游走三个电视台，仲大玩食字：「嚟！乐意呀！」讲到金刚有意下年迎娶台湾女友梁云菲，但当他得知女人婚后身份即变师奶，他即搞笑：「唔可以畀女友知，唔系唔肯结婚。」撰文：杜淑霞 摄影：李维隆 场地：Hyphen Party & Event
麦包和金刚直言，知道拍档是对方便好放心，麦包说：「大家熟有默契好多，有时搞gag都知对方底线同埋知道佢会接到嘛！」首次跟ViuTV合作好新鲜，麦包大赞自由度好大，「佢哋会叫你讲咗先，唔得到时先剪，但TVB会顾虑好多，有时搞gag，譬如话个人好似金刚，但连金刚个名都唔讲得，咁就冇咗个笑位啦！」问到怕唔怕之后难再返TVB，麦包就笑言：「未试过都想试吓！（但系黄淑仪可以游走三个电视台呀！）我哋都想呀！」两人更异口同声话非常欢迎邀请，仲大玩食字话：「嚟！乐意呀！」
金刚计划惊喜求婚
讲到今次同班师奶一齐去旅行，麦包话她们比想像中大胆，「我哋专登搵啲好刺激嘅嘢畀佢哋玩，点知佢哋完全唔惊，想挑拨佢哋闹交又唔成功，所以下次想公开招募全素人参加者，应该会好玩啲。」金刚又提议下次可带母女同行嘅旅行团，帮手解决家庭问题做和事佬，「最好去马尔代夫拍，大家着住泳衣应该会好正。」讲到金刚有计划明年跟女友成婚，但女友要求求婚要惊喜到喊，麦包曾提议他搞大女友个肚，问到金刚会否采用，他即笑言：「佢睇到验孕棒嗰两条红线，一定好惊！」讲到到时女友够资格参加《C9旅行团》，金刚才知结了婚就变师奶，他即搞笑：「一定唔可以畀女友知咁解，唔系佢一定唔肯结婚。」
最新回应