【头条独家】王梓轩狂赞女神娶得过 陈炜爆同男友未到结婚地步
2019-12-05 19:30 
陈炜和王梓轩最近在剧集《多功能老婆》首度合作，梓轩坦言期待同炜哥拍档已久，仲大赞炜哥是100分多功能老婆，将来搵到个有炜哥一半的对象都心足。不过问到男友陈医生几时有这福气，炜哥竟自爆未到结婚这地步。两人又提到戏中一场一镜落的牀上戏，梓轩惨被炜哥不停击中要害，提起都觉尴尬。撰文：杜淑霞 摄影：李维隆 服装：Weekend Max Mara(炜哥)、Neil Barrett(王梓轩)
炜哥和梓轩虽然是第一次演一对，但大赞监制陈宝华的剧本令他们好易投入，炜哥说：「佢个角色官仔骨骨好有才华，真系唔使做，本身都有嗰种气质入型入格，我好自然就有嗰份距离感。」梓轩大赞期待跟女神合作已久，「好容易投入，明益我，呢方面真系唔使演，坐底两分钟听把声都有feel啦！系难抽离啫！医生Chan Sorry！哈哈！」
拍牀戏击中要害
梓轩又大赞炜哥完全符合多功能老婆条件，「最正嘅女人，唔系千依百顺，系有自己追求嘅事业谂法，自己都希望自己伴侣都系咁，但系难，咁多炜哥咩！（搵到未？）搵到会同大家分享，带畀炜哥过目（炜：见奶奶呀！）佢话有佢五成就OK！」问到炜哥男友陈国强医生有冇呢个福气，她就话：「我点知呀！佢都未到呢一步，我哋冇结婚计划，𠵱家开心就OK！」
讲到难忘戏份，炜哥即大爆两人有场好激的牀戏，即令梓轩个样劲尴尬，他坦言对住女神怕羞。炜哥说：「讲我哋喺牀度激烈争辩，仲有啲动作，个拍法系一个shot落，由我入屋到牀，由头到尾，都几深刻。我最叻就系，唔使度位，每次都击中佢要害！哈哈！」问到梓轩详情，他即大卖关子笑言：「我中到啲嘢跌晒出嚟，到时大家留意啦！」
最新回应