【头条独家】发哥甜言蜜语诱行山江美仪熟女变紧致索

2019-12-05 23:00

现年48岁，啱啱拎咗TVB长期服务奖十年老人金牌嘅江美仪愈变愈后生，身材仲fit到爆。江美仪一脸满足多谢周润发：「全靠佢用甜言蜜语嚟鼓励我行山，发哥叫我keep好啲，第时同佢合作，做戏中女主角呀。」有张咁大期票，发哥成功向美仪「放毒」，𠵱家行山渐渐成为美仪嘅嗜好。采访：方骞平

江美仪一直提不起兴趣行山，直至受朋辈影响，见方平、鲍姐(鲍起静)等跑完后身体好咗好多才尝试。经用心苦练，进步神速，才掹车边进阶发哥领军的高级组：「发哥成日鼓励我跑多啲，放松啲！咁样会令身体健康啲！佢好好，好识氹人开心，同我打气，佢同我讲：『以前合作嘅女星个个结晒婚生晒仔，唔做呢行喇，咁我出嚟拍戏都要搵女主角㗎，咁你就啱我喇，但如果你唔Keep，咁我一路后生落去，相反，你就会变老，咁第时你就要做我阿妈㗎喎，所以你都要keep住做运动呀！』」因为发哥把口实在太劲，江美仪的起心肝去行山。

同前夫有联络

对于行山感觉，江美仪狂赞，「自从行咗山之后的确冇晒水肿，个人结实同精神咗好多，𠵱家好似上咗瘾咁，每周好期待呢日来临，每次跑完山发哥都会请埋我哋班队员去食饭，有时佢仲会带埋私人教练嚟指导大家，发哥为我哋健康著想，出钱出力，又可联谊，咁都唔做就太蠢喇！」不经不觉江美仪喺电视行业22年，前朝喺亚视属起步阶段，直至近10年过档TVB打拼，今年正式转咗一年一show新合约，主力向外搵真银。回想当年向亚视祼辞并无后路，好谷底，幸得当时姑奶吴君如帮手穿针引线过档无綫，跟住得到黄金10年。问她可感唏嘘？美仪话冇，仲话同吴君如及前夫吴君祥都有Keep住联络。