【头条独家】恐怖脑膜炎生死搏斗168小时 韩马利死过翻生要享受人生

人生无常，对险死的韩马利（Mary姐）来说有深切体会。今年八月，65岁的Mary姐因脑膜炎在医院昏迷了一周，原来当时相当危险，一只脚踩咗入鬼门关，连医生都话：『好少咁大年纪仲患脑膜炎，会比较棘手。』对症下重药三星期，冇咗炎症，但接下来还要面对脑部受损后引发嘅种种后遗症，包括有轻微抑郁症、气虚血弱同埋脑筋迟缓等状况。执返身彩的Mary姐坦言唔怕死更有感而发：「唔知馀下日子仲有几多，要过有质素、有意义嘅生活，要丰盛人生。以前冇做过嘅事，亦要补偿返畀老公，至少要多啲去欣赏佢。」采访：方骞平 场地：IDance

呢场生死搏斗喺今年八月发生，面黄黄的Mary姐忆述时犹有馀悸：「好记得嗰日凌晨出发，抱病同老公杜燕歌去内蒙古做嘢，当时个身滚滚地烧得唔算严重，以为只系普通感冒啫，啪粒成药就冇事，点知两日后返港仲未退烧，好彩我顺老公意去睇医生，医生建议我马上入院，当时我仲未知死，怀疑医生错判，最后印象坐上轮椅搞入院登记，之后发生乜事就唔太清楚，因为经已陷入昏迷状态，断晒片！」

昏迷七日吓死老公
Mary姐昏迷一星期后稍为有返意识，「原来喺头7日未断到症嘅日子，我嘅病情相当危急，严重到神智不清，要抽骨髓嚟化验，但咁痛我都冇知觉。老公当然好惊，不知所措系咁喊，话宁可我好似以前咁成日驳佢咀！探过我嘅朋友话，当时我讲嘢语无伦次相当恐怖，问埋啲奇怪嘢，嚷著话执行李走，要赶去拍剧集《唐人街》(其实套戏已拍完)，又反问护士点解唔畀我走？我只系嚟探病喎！甚至一日偷走过两次，又试过突然走入厕所，除晒啲衫话要冲凉，吓到护士飞奔入去帮手。医生见我神智好唔妥，决定安排我照磁力共振照吓个脑，最后确诊系脑膜炎，估计因为我有几日去唔到厕所，细菌排唔出体内上咗脑，所以𠵱家我好重视便秘问题。」

食唔落患轻微抑郁
Mary姐吊咗三个多星期抗生素，虽然一日比一日清醒，但开始发觉脑部转数变慢，唔识揿电话回覆朋友讯息，个人又晕陀陀，好攰好攰，起身15分钟就要瞓返落牀，真系执金都冇力，原来要面对好多后遗症开始识惊：「我几日几夜食唔落嘢，吞极都吞唔到，每次食嘢好想喊，老公好担心我要插胃喉灌食，猛劝我食小小粥水，因为又瞓唔到，个人好虚脱，好负面，好恐慌，而且手震、脚震，要老公拖住行，甚至瞓到半夜全身出汗，但系咁打冷震。医生讲明唔可以再病，一病就救唔到我，老公怕我冷亲，成晚帮我全身摄乾毛巾吸汗。后来经教友介绍再睇心理医生，评估我因为脑膜受损影响有轻微抑郁症，要食六个月血清素控制，加埋高剂量维他命C及补脑补充剂，现时食得瞓得，由最瘦得返46KG回升到50KG，虽然记性仲系差小小，尤其系唔记得人名，但我当自己好返晒。哈！我谂我暂时拍唔到古装剧，做唔到专业律师、医生、法官。脑科医生话最快要等半年畀个脑康复，叫我惟有打多啲麻将。」

忏悔要做个好老婆
Mary姐因为病而拉近了两公婆的关系：「今次变相系祝福，发觉原来老公好细心，结婚三十年从来未见过佢对我咁紧张，服侍周到，朋友提供健康餐单，佢就照办煮碗整畀我食，如人蔘炖汤，后来睇中医先知嗰个阶段虚不受补，所以食到我…哈哈…老公仲祷告话宁愿啲病畀晒佢，因为老婆唔识得照顾自己喎，好感动，以前佢有乜嘢都唔表达出嚟，我系男人性格，佢唔讲我鬼知咩。回想返老公试过发高烧入院，我坐咗阵就话赶住去开工，佢怪我冇煲过嘢探病，三日后仲要自己出院，但我以为佢小题大做喺度玩嘢；我又冇陪佢做激光打肾石手术，当时我开工开得密嘛，见佢冇事咪返工罗！呢啲老婆咪衰罗，边度会衰成咁，𠵱家倾返我有同佢say sorry㗎，以后我都唔会成日投诉佢，尽量唔会驳佢咀。」