阿碌开咪｜做人最紧要正面

人以群分，物以类聚。小弟生性Positive，所以，最怕与班乜都Negative的Haters交往，话不投机半句多。佢哋睇样样事都负面，乜都衰，挑挑剔剔，讲到就快世界末日咁款，好冇趣。

以前因要返工，被逼乜人都要接触，自然正人、邪人、乐观人、悲观人……只因工作需要，就见，就交往，几唔锺意也冇法，因This is my duty，专业人就做专业事。

幸而这生涯不会一世。退休一刻开始，立即来个「断舍离」大法，将所有负能量Haters斩斩斩，斩去连系。将时间改为结识同声同气人，快快乐乐过活。

一年前四围饮饮食食，去到一家「凯日」酒家。基于其烧腊师傅Philip极有料到，故此很快变熟客，连执行董事张梅姐姐也经常联络，有乜想食或订位，口到拿来。

岂料四个月前突然唔见佢再上班，乜事呢？问经理聪哥。佢苦口苦面话：「唉，梅姐事事亲力亲为，昨晚打烊后到厨房帮手，唔小心踩在油污上，成个人向前仆，对手一叉，右手腕卜的一声，大细骨断晒。立即送医院做手术，要用螺丝、钢片驳返！」

四个月转眼过去，昨晚又到「凯日」。咦，离远已见梅姐精精神神坐镇指挥。

匆匆埋去打招呼：「梅姐，好返未，仲痛唔痛呀？第日入厨房，记住要小心呀！」

好一个梅姐，又系Positive之霸，笑笑口话：「碌Sir，意外要发生就发生㗎啦，今次跌倒，可能帮我挡过更大一劫呢，哈哈！冇乜好怨！人生就是如此，祸福相倚㗎！」

讲完，殊声调头招呼人客去。

真喜欢与正面又幽默者交往。另一人办为马会前主席陈南禄，上月有日打畀我：「碌Sir，我昨晚PK呀！」乜事？原来佢巡新装修投注站，一跣脚，个头落地，嘴部大出血，两只门牙飞脱。

「哈哈，成棚整过，可能两个月后靓仔过汤告鲁斯，佢前面棚牙都系假㗎！」

曾智华

阿碌开咪

 

编按原题为「做人切忌「大喊十」」