阿碌开咪｜人妻投注大法 又煞食又最准

每个赛马日睇直播，我不会在大电视睇正正经经的大台节目，因为实在太四平八稳，淡如开水，有资料而冇趣味，犯下吸引力大忌。

赛马，也是娱乐的一种，绝对不可太「官方」，否则就似N年前香港电台的失败喉舌节目《奉告》，闷到抽筋，不少观众一听到片头音乐，立即转身入厕所，甚至熄机，边个会欣赏「膏药」㗎？

有点好奇，究竟「官方」赛马节目，系想多点人睇，定冇乜所谓呢？

咁小弟边处睇直播？正是睇星岛集团的《赛马日在线》。两年前面世时，我曾多多口畀意见，例如提议增加陈华栋老哥的「排队马」，兼且要派密探式人物在沙圈观察，专报小道消息及花絮，增加吸引性，满足八卦欲。

结果，「排队马」果然出现。不过，唔知点解今季消失咗，栋哥每场只畀一只自己心水，过瘾程度大大减低。

不过，幸而提供现场八卦料的亨利，仍然在阵，不时细细声鬼鬼祟祟报道沙圈观察。其中最煞食又最准确的，为创出「人妻投注大法」。即系点？因此君全天候躲在沙圈暗角，观察有冇练马师、骑师的妻子或亲戚突然入场，甚至落沙圈打气。若有，就是出击先兆。因骑师皆男性，要威爱英雄感，若估计场场跑包尾，咁瘀，点会叫老婆入场？所以，老婆出现，尤其大肚都入场，一定有马博，值得关注。

呢呢，上周三佢又一棍扑正，目及 到潘顿老婆及外母入场。另外，更罕见为冷门骑师嘉里太太也高调出现。

结果点？当然「人妻投注大法」又灵验。尤其嘉里，爆出一只十五倍冷门「勇眼光」，有跟进者，肥过肥猪仔矣。且看今晚亨利又有冇料到嘞。

自从冇咗拉叔后，潘顿只手遮天任佢「开」。开「忽虫」食白果得，好似上周日咁开「忽龙」连扫七W又得，吹佢唔胀，掹佢唔长。

马会新主席，唔该做吓野，搵高手来港平衡一下好吗？

今晚「俏芳华」梗胆，一于飞起潘顿「喜骏驹」，改要「连连欢呼」！

曾智华

阿碌开咪