阿碌开咪｜做个聪明嘅老公

男人，结婚愈耐，回到家时会愈沉默，并唔代表佢哋冇嘢想讲，而是……知道讲完之后，可能要啃苦果，所以，选择收声。

一切想讲的，留返同猪朋狗友喷口水Bullshit时才呻，安全系数高好多也。

呢方面，举世做太太的都未必明，但又无谓明，因明咗都不会有改变。

认识不少在官场、专业或私人机构做头头的人物，虽则日理万机，做主席主持会议一个接一个，但一踏入家门，立即个口撬都唔会开。

呢类人士，通常在社会上有一定知名度，所做的事，不少与大众利益攸关（例如高官、政客、法官、上市公司CEO）。正常地，当然有同路人，也会有「对头人」（不一定敌人），所以，都会背后对你「说三道四」，间中呢类闲言闲语若见诸媒介，咁就烦。

因为纵使你老婆明白事理，不过，佢的生活圈子，无论亲戚或朋友，总有不少Heresay之辈，以讹传讹之下，对你的行事决定，必有批评。然后，辗转去到老婆大人的「雷达范围」，诸事的，可能直接窒：「听讲有人话你老公乜乜物物喎（通常系衰嘢，例如得失人啊、畀人砌呀、处事不公呀、有小三啊……）。」人，总会受人影响。当你老婆听得多，当然唔开心，于是等你返闺时，少不免呻或质两句。

咪睇轻呢类「呻/质两句」的威力，绝对会令大人物不胜其烦，可能影响日后处理公事时，再没法作出百分百公正无私判断。只因佢都系个人，人总会受情绪影响也。

间中，小弟都有拥有公权者老友埋怨：「唉，真系烦。返屋企点可透露公事？」

不过，万事有相对的。我就不时玩「周街赞人」，尤其出色的厨师。赞呀赞（要真心的），说话好易会传到去厨师老婆、外家、老友、同学、同行耳中，于是，就出现老婆甜蜜蜜话：「老公呀，有人赞你乜乜物物喎！」

呢下鼓励，令正能量爆升，整乜畀我叹都好食啲㗎！

曾智华

阿碌开咪

 

编按原题为「你老公乜乜物物」