阿碌开咪｜拥公权 须敏感

入境处副处长郭俊峯及首席入境事务主任汪奇，中秋节前各收咗一个送上门的名贵食物篮，竟然「咁啱」被全程拍到，连内容有乜都统统透明化。送礼的人，正是近日非常受关注的恒大集团执董、香港公司总经理黄贤贵。

　　略有「江湖经验」者一睇就知，根本整件事充满「幕后部署」，有人「儍下儍下」，竟毫无戒备而入咗局，虽冇犯法，仍一身「奶油」（招惹大量蚁也）！

　　昨晚刚与几位廉记前高层及两位著名「担X唔偷食」退休高官晚饭，当然又提起此事。

　　老廉A：我以前拉过不少高官，发觉，原来并非愈高位者会愈小心的。反之，坐得愈高，愈少受监察，多敌不过人性中的贪婪，两下就畀商界大鳄攻陷。

　　老廉B：系㗎！坐高位者，有责任监管下属Whiter than White。而佢自己则位高权重，怎不Bound to be Corrupted？商界大鳄同你搞关系，当然「包装」成朋友，继而称兄道弟猛送礼啦。你以为大家有真感情？有冇再天真啲？你睇下「煲呔」同「肥龙」以前称兄道弟班商家去晒边？

　　老廉A：人哋送礼物时，当然话冇公事关系啦。你懵懵哋收下一次，收下又一次，收咗十次之后，有需要时，你个「朋友」突然要求你「帮帮手」，你点反应？更重要，你有冇先搞清楚，啲果篮及礼物，是否开公司数？

　　清官C：其实，官场皆知，有两类纪律部队阿头，大富豪特别喜欢同佢哋「做朋友」、称兄道弟，一为入境事务处，另一为海关！N年前政府最高层已知呢两个部门敏感，故一段时间，只派AO空降，以免两部门决策层与外边有太多不正常复杂关系。

　　清官D：系罗，今次呢单，收礼的，一个睇签证，一个睇Control Point，两个锁匙位把关人物咁样收「朋友」礼物，若你系佢哋下属会点睇？我都好想公务员事务局局长聂德权暂时放低「谷针」，对呢单野讲两句！

曾智华

阿碌开咪