【阿碌开咪】专家唔听，听「佢哋话」

日日出入酒楼食肆茶记，我听得最多的，一定是讲钱钱钱钱钱！似班傻佬讲完钱，钱就会从天而降咁款，真无聊。

另一种个个不停讲的，就是口头禅——佢哋话。乜都「佢哋话」一番，究竟乜叫「佢哋话」？「佢哋」又系边个？有几巴闭？一概唔知。总之个个「佢哋话」一轮之后，就冇人问Source。怪鸡！

昨晚聚餐，在座又有一个猛咁「佢哋话」嘞。

事缘政府摆明对唔打疫苗者步步进逼，收网咁，愈来愈紧。由开始的「自由决定」，到早前的唔打要自己畀钱检测！

最新，提出四招谷接种率，包括：一、高风险场所工作人士，必须强制接种（再冇选择！）；二、企业促员工接种，否则自费定期检测（又烦又要出钱，点顶？）；三、安排医护到屋邨为长者接种（呢招最正路）；四、研究未打针者禁入指定场所（最攞命！即可能未打针者，分分钟处处贴出「疫苗禁足令」，搞到你变公众场所「二等人」，别人入得你唔得！）。

第四点，放住风先。大家必须有心理准备，为谷针，必定一步步逼埋嚟！

打唔打针，当然属个人基本自由。

小弟乃最早一批公开飞身去打针者。原因ABC咁简单，就是到目前为止，只有打针属避免感染及传播病毒最有效方法，亦只有人人打齐针，社会才可逐步恢复正常。

对，若果有其他办法选择就更好，弊在到今天，全世界都冇噃。

昨晚聚餐，人人打晒针，可以坐D区，「照住」一位未打者。问问佢，为乜唔打。

「佢哋话，会打死人，打到你中风，打到你面瘫，打到你心脏病㗎！」

「系咩？边个系『佢哋』呀？专家？做乜你会信嗰个『佢』呢？话畀我知神秘人物系边个吖？」

「唔系知名人物，总之，『佢哋』话政府为咗引市民打针，将大量不利消息，包括几多人打死咗都隐瞒㗎！」

点解我会同呢种白痴「佢哋话」一族共饭㗎？

曾智华

 

阿碌开咪