維港會：網民巴士上食包 發文問啱定錯惹熱議

香港人工作繁忙，分分鐘連食飯時間都無，有網民喺Facebook群組「巴打絲打」度開po，稱自己平日朝早都係買個蒸包食住等巴士，不過今日遲咗，個包未食完就拎咗上巴士食，結果惹來司機同乘客批評。

佢指司機話佢「阿妹，你食都唔好咁明目張膽係我隔離食呀，我話你又唔係，唔話你又唔係」，樓主就隨即連聲「Sorry」，而坐佢隔離嘅乘客就對佢嘖嘖聲，話「以(依)家啲後生女，真係當規矩死㗎，巴士食得嘢㗎咩」，樓主表示自己呆咗一呆，隨即連聲「Sorry」。

對於咁情況，樓主表示好不解：「好奇一問，我都係(喺)食個包，仲要冇味冇碎，乜真係咁多人介意有人係巴士食嘢咩？」，唔少網民都批評事主車上食嘢係唔啱，認為香港就算再遠都係一個鐘車程「落車先食都頂到」；亦有網民話「樓主都知自己係唔啱，只係想討論下啫」、「打工仔辛酸」。