符曉薇《生產記》爆Jason入手術室扮醫生氹姑娘笑

陳柏宇（Jason）太太符曉薇（Leanne）今日抱B女齊齊出院返家前，於instagram發《生產記》長文，爆料由穿羊水一刻老公扮睡覺不理她；到她出門口去醫院叫老公拿走佬袋，老公答他不用，還說：「唔似有啲乜，人哋拍戲嗰啲唔係咁」。
去到醫院姑娘證實Leanne穿羊水要急Call醫生來接生，Jason依然同護士講：「乜同拍戲咁大分別嘅，乜穿羊水咁平淡」。入手術室陪產的Jason換完藍色手術室衫，先同姑娘說：「你好我係今日嘅醫生」，見到麻醉科醫生還繼續厚面皮說：「原來你係醫生我以為我自己係醫生」，醫生和護士都笑她的老公好搞笑，她卻謂：「我問返佢哋搞事定搞笑丫」。當B出生，Leanne謂：「聽到佢喊果（嗰）下真係滴咗幾滴眼淚，之後望佢條粉蛋佢已經喊到豬頭咁；醫生仲問佢剪唔剪臍帶啊？佢即刻say no」，然後以「原來生小朋友都唔可怕，最可怕係個老公日日夜夜對住你個女係咁影係咁影」作結。
網民則謂：「就係你老公係咁喺度玩，你先無咁緊張嘛。」、「陳伯可以一直貫徹佢搞笑嘅作風，連入到手術室都依然不變，厲害」。

Leanne全文：
首先25號9點幾起身痾尿
點知好似唔識停咁
仲有少少血
心諗呢啲會唔會叫做穿羊水呢
我仲喺廁所大叫陳廣偉
點知條粉蛋以為我叫佢執屎執尿
佢扮聽唔到繼續瞓覺
我唯有着返條褲 入房攞返部電話
嗰個時候啲水係仲流緊
打電話去到醫院 姑娘已經叫我哋即刻過去
我就入房拍醒條粉蛋
出門口嘅時候我仲同佢講
攞埋個走佬袋出去
點知佢同我講話唔使
佢話唔似有啲乜
人哋拍戲嗰啲唔係咁
如果真係要生嘅先返嚟攞
最弊嘅係我竟然聽佢講
去到醫院姑娘檢查完就話係穿羊水
即刻call醫生返嚟接生
之後條粉蛋仲同姑娘講
乜同拍戲咁大分別嘅
乜穿羊水咁平淡
姑娘同佢講嗰啲係做戲
之後入到手術室門口
條粉蛋換完套藍色手術室衫出嚟
好正經同我同姑娘講
你好我係今日嘅醫生
呢個時候麻醉科醫生行過嚟
同我哋介紹自己
點知條粉蛋好厚面皮咁講
原來你係醫生我以為我自己係醫生
啲醫生護士喺度好開心咁樣笑
仲同我講你先生好搞笑
我問返佢哋搞事定搞笑丫
之後我就推入手術室
喺嗰個時候先開始緊張
因為聽好多朋友講打背脊嗰支麻醉針係好痛
啲醫生同護士好溫柔
一路叫我唔好緊張
話支針好幼 唔會痛
竟然真係唔痛 之後我下半身已經進入麻醉嘅狀態
喺嗰個時候10分鐘唔使我個女就出咗世
成個過程我都唔係好感受到好痛的感覺
聽到佢喊嗰下真係滴咗幾滴眼淚
之後望佢條粉蛋佢已經喊到豬頭咁
醫生仲問佢剪唔剪臍帶啊
佢即刻say no
手術半個鐘唔使就完成
原來生小朋友都唔可怕
最可怕係個老公日日夜夜對住你個女係咁影係咁影