符晓薇《生产记》爆Jason入手术室扮医生氹姑娘笑

陈柏宇（Jason）太太符晓薇（Leanne）今日抱B女齐齐出院返家前，于instagram发《生产记》长文，爆料由穿羊水一刻老公扮睡觉不理她；到她出门口去医院叫老公拿走佬袋，老公答他不用，还说：「唔似有啲乜，人哋拍戏嗰啲唔系咁」。
去到医院姑娘证实Leanne穿羊水要急Call医生来接生，Jason依然同护士讲：「乜同拍戏咁大分别嘅，乜穿羊水咁平淡」。入手术室陪产的Jason换完蓝色手术室衫，先同姑娘说：「你好我系今日嘅医生」，见到麻醉科医生还继续厚面皮说：「原来你系医生我以为我自己系医生」，医生和护士都笑她的老公好搞笑，她却谓：「我问返佢哋搞事定搞笑丫」。当B出生，Leanne谓：「听到佢喊果（嗰）下真系滴咗几滴眼泪，之后望佢条粉蛋佢已经喊到猪头咁；医生仲问佢剪唔剪脐带啊？佢即刻say no」，然后以「原来生小朋友都唔可怕，最可怕系个老公日日夜夜对住你个女系咁影系咁影」作结。
网民则谓：「就系你老公系咁喺度玩，你先无咁紧张嘛。」、「陈伯可以一直贯彻佢搞笑嘅作风，连入到手术室都依然不变，厉害」。

Leanne全文：
首先25号9点几起身疴尿
点知好似唔识停咁
仲有少少血
心谂呢啲会唔会叫做穿羊水呢
我仲喺厕所大叫陈广伟
点知条粉蛋以为我叫佢执屎执尿
佢扮听唔到继续瞓觉
我唯有着返条裤 入房攞返部电话
嗰个时候啲水系仲流紧
打电话去到医院 姑娘已经叫我哋即刻过去
我就入房拍醒条粉蛋
出门口嘅时候我仲同佢讲
攞埋个走佬袋出去
点知佢同我讲话唔使
佢话唔似有啲乜
人哋拍戏嗰啲唔系咁
如果真系要生嘅先返嚟攞
最弊嘅系我竟然听佢讲
去到医院姑娘检查完就话系穿羊水
即刻call医生返嚟接生
之后条粉蛋仲同姑娘讲
乜同拍戏咁大分别嘅
乜穿羊水咁平淡
姑娘同佢讲嗰啲系做戏
之后入到手术室门口
条粉蛋换完套蓝色手术室衫出嚟
好正经同我同姑娘讲
你好我系今日嘅医生
呢个时候麻醉科医生行过嚟
同我哋介绍自己
点知条粉蛋好厚面皮咁讲
原来你系医生我以为我自己系医生
啲医生护士喺度好开心咁样笑
仲同我讲你先生好搞笑
我问返佢哋搞事定搞笑丫
之后我就推入手术室
喺嗰个时候先开始紧张
因为听好多朋友讲打背脊嗰支麻醉针系好痛
啲医生同护士好温柔
一路叫我唔好紧张
话支针好幼 唔会痛
竟然真系唔痛 之后我下半身已经进入麻醉嘅状态
喺嗰个时候10分钟唔使我个女就出咗世
成个过程我都唔系好感受到好痛的感觉
听到佢喊嗰下真系滴咗几滴眼泪
之后望佢条粉蛋佢已经喊到猪头咁
医生仲问佢剪唔剪脐带啊
佢即刻say no
手术半个钟唔使就完成
原来生小朋友都唔可怕
最可怕系个老公日日夜夜对住你个女系咁影系咁影