維港會：僱主幫外傭徵二手衫惹熱議 網民斥刻薄工人

隨着環保風氣盛行，愈來愈多人都響應社交平台的「二手徵讓」群組。有僱主近日亦為外傭徵二手衫，結果掀起熱議。有網民撐僱主是支持環保，認為徵二手衫沒有問題；另有網民則批評是「刻薄工人」，稱「有錢請工人，無錢買件衫俾佢，我做唔出」。
有網民在facebook群組「二手市場淘寶站」發帖稱，「幫工人姐姐徵二手衣服」，並列出的外傭的身高、體重等；帖文又附有外傭背面的照片。樓主的帖文隨後掀起熱議，雖然她已經刪帖，但有網民仍截圖轉發，繼續討論。
網民留言兩極，不少網民認為樓主是響應環保，「徵收都要俾錢架，二手有咩問題先？」、「如果新淨，我自己都唔介意著二手衫」，有家長亦分享曾為BB徵二手衫，留言問「BB可以徵二手衫點解幫工人徵就有問題？？徵二手衫等於涼薄係咩道理？？......又唔係比啲爛衫佢著，相信僱主都會揀過新淨嘅先比工人。」
至於另一批網民則指出，因為樓主與外傭是僱傭關係，「令人感到刻薄工人囉，你話工人自己徵，我覺得無問題，但由個僱主徵，感覺就好差。就好似你返工，經理俾件上手著過嘅衫俾你一樣」、「如果樓主徵俾自己穿，我覺得係環保啫，但如果徵俾工人穿，我會諗樓主是苛刻的僱主」、「第一次見有人徵二手衣服，但唔係自己要，係比个工人囉，同環保有乜關係？」