飛鵝山自殺崖邊拗頭呃like 差錯腳點算？

氣勢磅礡的飛鵝山有個飽覽九龍景色，如大地在我腳下的自殺崖平台位，近年成為打卡熱點，但一位女子卻大膽走到平台邊沿位置擺甫士拍照呃like，即時惹來網友議論。

有行山友昨日將這張見者腳軟的圖片，上載到facebook群組「香港行山遠足之友（吹水山谷）」，由於相中女子走得太近邊沿，又無繫上安全裝備，從相中可見，稍一不慎，差錯腳便有可能墮崖。

發貼者驚呼︰「究竟咩人個膽可以大到咁樣，我見到我個心都差啲跳出嚟」，並曾好心勸喻替相中人拍照的女子︰「同女仔朋友講叫女仔唔好企咁出好危險」。

有回應的網友認同發貼者心情，指「用條命去搏一張相」。細心看過圖片的網友則留言，「哩位小姐嘅衣著真係唔多似行山遠足之友，佢咁有勇氣行到崖邊再拗吓個頭，真係以為佢想唔通想自殺喎！」另有網友指，「其實呢個位都幾特別， 只係無需要企咁出。」