古巨基見老婆露臍即嚇親 周慧敏爆當年幫手保密地下情 　

古巨基下月於紅館舉行演唱會，昨晚他於私人工作室率先舉行兩場小型音樂會，先於工作室的浴室中，跟網民進行「浴室Music Live 」，接著於廚房舉行「阿基廚房」私人派對，兩個Live加起來有超過百萬觀眾同步觀看。

基仔與樂隊齊齊穿上浴袍，自稱是最新組合「浴袍團」，唱大熱經典金曲外，還讓歌迷網上即時點播，有歌迷因爲浴室場景就點了范曉萱的卡通健康歌《我愛洗澡》，又有歌迷點了劉德華的國語舊歌《馬桶》，以為可以難倒基仔，但愛唱歌的基仔點甚麼都能唱。

玩完廁所，基仔一班好朋友周慧敏、雷頌德及雷太、森美都來了現場做直播，與網民邊吹水邊唱歌。基仔好友如關心妍、方力申等都有在社交平台同步觀看及打氣，連容祖兒收工後也衝進來支持及點唱《花灑》。身為基仔好友兼演唱會音樂總監的雷頌德，更大爆基仔與老婆Lorraine的地下情令他保守秘密得十分辛苦，「明明知係佢條女啦，連我老婆有次也爆響口話你條女，但係佢兩個都係唔出聲，唔認唔知唔理，搞到我哋一班朋友其實扮唔知都扮得好辛苦，到前幾年，有1日佢突然間話，唔該幫我寫首歌畀Lorraine，我就好開心大笑，問佢寫咩歌？寫首《最佳助手》呀？基仔先話唔好玩啦，我結婚啦！當時我真係好開心！好啦你終於肯認，以後唔駛咁煩，哈哈。」雷頌德爆完忍得辛苦，隨即有網民抵死留言：「咁你係咪同黎明守秘密都守得好辛苦？」

周慧敏又爆Lorraine當年與基仔拍拖後有大變化，因為未拍拖前的Lorraine平日會穿短裙、低領衫，拍拖後就算大熱天時都包到實，「我硬係感覺到佢兩個有嘢啦！我識古太仲早過基仔，不過我都係扮唔知囉，明明見到古太成個人打扮變晒都唔出聲囉。」基仔亦搞笑爆料：「我冇迫老婆著密實！當年佢第1次帶我入電台派歌宣傳，佢著露臍裝，成個肚臍畀我睇晒，我睇到眼都突埋。」